Нэһилиэкпитигэр кэлин кэмҥэ волонтердар үлэлэрэ ордук тубуста. Үлүскэн үгүс үлэлэригэр эбии, быйыл сайын ытык дьоммутугар анаммыт сквергэ мас олортулар.
Бу үтүө дьыаланы «Холумтан» түмсүү кыттыылааҕа, нэһилиэк тупсарын, сайдарын туһугар ис сүрэҕиттэн кыһаллар, бары тэрээһиннэр көхтөөх кыттааччылара, уран тарбахтаах иистэнньэҥ, мас ууһа, сэдэх үүнээйини табан олордооччу, Мария Яковлевна Гаврильева «Сир симэҕэ» диэн акцияны тэрийэн үлэлэттэ.
Волонтердар салайааччылара, орто оскуола технология предметин учуутала Василий Владимирович Килижеков уолаттарын салайан, Мария Яковлевна сүбэтинэн мас түөрэн, тракторист Николай Николаевич Докторов тиэйэн аҕаллылар. Уолаттар хатыҥ, харыйа, рябина олордубуттарын кэннэ, «Холумтан», «Иэйии», «Алаас» түмсүүлэр, Николай Семенович Дьяконов көмөлөһөн, аны сибэкки эгэлгэтин олортулар, сквери өссө киэргэттилэр. Онтон сайыҥҥы уу систиэмэтин Тимофей Константинович Беленков чугаһатан тардан, мантан сайын «Тайбаан» түөлбэттэн Мария Михайловна Дьяконова салайар «Алаас» түмсүү эбээлэрэ бүөбэйдиэхтэрэ, көрүөхтэрэ-истиэхтэрэ. Оччотугар силигилии үүнэр сир симэҕин быыһыгар ытык дьоммут мэтириэттэрэ, ааттара өссө тупсан көстүөҕэ.
Онтон, үтүөҕэ сирдиир этиилэри Тыайа дьоно-сэргэтэ үөрүүнэн ылынан, көхтөөхтүк кыттыһан иһиилэринэн, инники сайдыыга улахан эрэллээхпит.
Екатерина Архипова.
Фото: Василия Килижекова, Аллы Дьяконовой, Елены Докторовой