Ааспыт сылтан инники олохпут кэскилин туһугар олохторун толук ууран охсуһа сылдьар хорсун-хоодуот дьоммутугар анаан күүс-көмө буолар үлэни төрөөбүт Тыайам нэһилиэгэр саҥа тэриммит «Холумтан» түмсүүбэр этии киллэрэн саҕалаабытым.
Манна амарах дууһалаах, аһыныгас санаалаах Тыайам дьоно бары тиһигин быспакка кыттыһан барбыттара. «Сылаас угут» диэн бастакы акциябар 60 наскы, бытархай мал, бэрэстээҥкилэр угуллубуттара. Мантан салгыы өрөспүүбүлүкэтээҕи «Симэх» галерея көҕүлээһининэн Алексей Николаевич Терехов Украинаҕа үлэлии барарыгар сиэлинэн, сукунанан 90 ымыыны оҥорон ыыппыппыт. Буойуттар санааларын көтөҕөр суруктары, улууспут «Дабаан» хаһыатын буойуннарга, кинилэр төрөппүттэригэр, Герой ийэлэргэ суруйтарыыны көҕүлээбитим. Түмсүүм кыттааччыта Анна Павловна Тарасова санаатынан илиигэ кэтиллэр бэлиэлэри тигиини кытта сахалыы ыраастана сырыттыннар диэн сиэли, боҕуруоскай оту, этиҥ түспүт мастарын хааларга уган, биир дойдулаах уолаттарбыт баралларыгар таҥаһы-сабы кытта биэрэн ыыппыппыт. Түмсүүбүттэн Мария Яковлевна Гаврильева этии киллэрэн көмүскүүр сиэккэни оҥорорго санаммыппыт. Егор Гаврильевич Старостин муҥха диэлин биэрэн, 20 миэтэрэ уһуннаах, 4 миэтэрэ кэтиттээх көмүскүүр сиэккэ икки көрүҥүн баайыыны Матрена Павловна Килижекова этиитинэн ыам ыйын 9 күнүгэр нэһилиэнньэни түмэр акциянан саҕалаабыппыт.
Маны тэҥэ, эмп ылан ыытарга анаан нэһилиэкпит дьоно кыттыһан, 45000 харчы хомуйан Айыл Дьулурҕаҕа туттарбытым. Нэһилиэгим тэрилтэлэриттэн – Мария Алексеевна Захарова салайар «Кэнчээри» уһуйаан – 6000 солк., Полятинскай Максим Владимирович салайар ОДьКХ – 6000 солк., Попов Айсен Николаевич Петр Афанасьевич Полятинскайдыын «Cахатранснефтегаз» – 4000 солк., Никифор Иннокентьевич Ефимов электроыстаансыйаттан – 7000 солк., Азалия Петровна Аргунова дириэктэрдээх Н.Х. Дьяконов аатынан орто оскуола – 6300 солк., нэһилиэк салалтата – 4800 солк., манна эбии баһылыкпыт солбуйааччыта Марина Афанасьевна Полятинская туспа – 7000 солк., түмсүүбүттэн Анна Павловна Тарасова, Мария Яковлевна Гаврильева, Зинаида Павловна Шамсутдинова бэйэбин кытта – 2000 солк., «Алаас» эбээлэр түмсүүлэрэ 1800 солк. харчы ыытаннар, 16 көмүскүүр сиэккэни атыылаһан илдьэн биэрбиппит. Маны таһынан, биирдиилээн оҕоҕо харчынан, малынан көмөлөһүүнү тэрийбитим, Айыл Дьулурҕаҕа туспа 5000 солк. ыытан, эмп ыларыгар көмөлөспүтүм. Уоппускаҕа кэлэн барар буойуннарбытыгар кылынан өрөн тымырдай, ымыылар, ардахха кэтиллэр хахха таҥас тигэн биэртэлиир үгэстэнним.
Акциялары тэрийэр кэммэр таарыччы дьоҥҥо тус сатабылы иҥэринэллэригэр анаан, наскы баайыытыгар, кылынан, сиэлинэн оҥоһуктарга маастар-кылаастары ыыталаабытым.
Дьэ бу курдук, эйэлээх, нус-хас олохпутун туруулаһа сылдьар оҕолорбут этэҥҥэ сылдьалларын туһугар мал хомуйуута, харчынан көмөлөһүү тиһигин быспакка ыытылла турар.
Екатерина Архипова