Сыллата Саҥа дьыл тыынын биллэрэн хаар, муус оҥоһуктарынан Мастаах нэһилиэгэр норуот айымньытын тиэргэнигэр, Н.П.Егоров оскуолатын тиэргэнигэр, Чуораанчык уһуйааҥҥа хаарынан, мууһунан оҥоһуктарынан үгэс курдук сыллата киэргэтэллэр. Уһуйаан оҕолорун, дьону -сэргэни үөрдээри чочуллаллар. Хаар-муус оҥоһуктар биһиги Кэбээйибит улууһугар элбээн иһэллэрэ киһини үөрдэр, сөхтөрөр, махтайар. Маннык мууһунан-хаарынан кыһан чочуйар уустарбыт, тарбахтарыгар талааннаах дьоннорбут үксүү турдуннар. Бүгүн Мастаах нэһилиэгэр биир бас-көс дьоммут, туохха барытыгар кыттар, кыттыһар талааннаах дьиэ-кэргэн Наталья Иннокентьевна, Прокопий Прокопьевич Григорьевтар буолаллар. Григорьевтар тиэргэннэрин саҥа сылы көрсө мууһунан оҥоһуктарын араас өҥүнэн дьиримнэтэн киэргэппиттэр. Манна бааллар мууһунан туппут дьиэ, саҥа сыл бэлиэтэ, харыйа, сахалыы үс атахтаах сандалыбыт уо.д.а. Григорьевтар төрөппүт уолаттара Ян, Иннокентий, Прокопий ылсан оҥорбуттар, чочуйбуттар. Түгэнинэн туһанан дьону -сэргэни үөрдэ-көтүтэ муус оҥоһук дьэндэппит Григорьевтар дьиэ кэргэттэригэр нэһилиэк аатыттан махталбытын биллэрэбит. Саҥа сылга үлэҕит-хамнаскыт таһаарыылаах, туппуккут тупсаҕай, ылсыбыккыт ыпсарыылаах буоларыгар баҕарабыт.
Сардана Жакипова
Талааннаах дьиэ кэргэн
