Сииттэбит нэьилиэгэ быстах анал эпирээссийэҕэ сылдьар биир дойдулаахтарбытыгар күүстээх, улахан көмөнү оҥорон, 2023 сыл түмүгүнэн Кэбээйи улууһун баһылыгын Иван Левин анал премиятын тутаммыт, сииттэлэр махталбыт, үөрүүбут муҥура суох. Ханнык баҕар үлэ түмүгэ үрдүк таһымҥа сыаналанара хас биирдии киһи сүргэтин көтөҕөр, санаатын күүһүрдэр, инникигэ эрэли эрэ үөскэтэр.
Инники эмиэ суруйан турабыт Сииттэбитигэр ханнык, туох үлэлэр бара туралларын. Билигин олохтоохтор биир сомоҕо буоламмыт, барытыгар күргүөмнээхтик үлэлэһэн, ылсыһан, түмүктээн эрэбит. Ол курдук, блиндажнай чүмэчилэри бэлэмнээһин түмүктэнэн эрэр. Манна эдэр ыччаттарбыт Захар Кривошапкин, Иван Сивцев уонна Егор Левин көмөлөрө улахан.
Икки, уһун миэтирэлээх маскировочнай сетка оҥоруута түмүктэнэн, бу кэлэр нэдиэлэҕэ Дьокуускай куоракка илдьэн анал пууҥҥа туттарыахтаахпыт. Нэһилиэкпит ыччаттара СВО-ҕа сылдьар оҕолордоох төрөппүттэргэ хаар күрдьүүтүгэр, дьиэ ис — тас ыарахан үлэтигэр, салҕыбакка эрэ күн бүгүнүгэр дылы көмөлөһөн улахан болҕомто уураллара олус хайҕаллаах суол.
Билигин буола турар ыарахан кэмнэргэ, бука бары биир сомоҕо буоллахпытына эрэ бары ыарахаттары туоруохпут диэн эрэниэҕи баҕарыллар. Дьиэҕэ олорор ийэлэрбит, эбэлэрбит улахан күүс — көмө буоланнар, кинилэр үтүө санаалара үүнэр ыччаттарбытыгар үтүө холобур эрэ буолар диэн киэн тутта суруйабыт.
Дьэ, ити курдук, Сииттэбит дьоно — сэргэтэ хонон турдах аайы, Кыайыы сырдык суһума сотору туругуруо диэн эрэллэрэ улаханын күүс-көмө өттүнэн көрдөрөллөр.
Марианна Сивцева.