Сииттэбит сиэдэрэй сирин, кылгас самаан сайынын уруйдаан, көрүөхтэн кэрэ сибэкки ыһыаҕын толору ыллатан, үйэтитэр сквердарбытын киһи хараҕа үөрэр, сүрэҕэ сылаанньыйар гына эриэккэс кэрэ сибэккилэринэн толору симээри, киэргэтээри бэлэмнэнэ сылдьабыт.
Ол курдук, сыл аайы Кыайыы скверын «Алаһа» эбээлэр (сал. Мотрена Васильева), «Иэйии» орто саастаах ийэлэр (сал. Марианна Захарова) түмсүүлэрэ ис сүрэхтэрин ууран туран сибэккиннэн симииллэрин таһынан, сайыны быһа сыыс оттоон, уу кутан, оҕолуу биэбэйдииллэрин, дьаһайалларын көрөн хас биирдии олохтоох үөрэр уонна киэн туттар буолуохтаах. Герой ийэлэрбитинэн киэн туттар сквербытын култуура үлэһиттэрэ уонна олохтоох дьаһалта кыттыһаннар көрөн-истэн олороллор. Инникитин үүнэн иһэр ыччаттарбытыгар ырааһы ыралыырга, кэрэни кэрэхсииргэ хайаан да бу үлэлэр үтүө түмүктээх буолуохтаахтарын быйыл бэлэтии көрөммүт олус үөрдүбүт.
Ол курдук, Сииттэбит орто оскуолатын алтыс кылаастарын үөрэнээччилэрэ, кылаас салайааччыта Анастасия Сидорова, 30 устуука петунияны олохтоох дьаһалтаҕа үүннэрэн аҕалан бэлэх ууннаннар олус үөрдүбүт. Бу ийэ скверын Анастасия Сидорова салайааччылаах анал проекка кыттаннар бэйэлэрэ оҥорбут улахан үлэлэрэ буолар. Кинилэр күрэххэ кыайыы өрөгөйүн билэннэр, бу проект бөһүөлэкпит биир бастыҥ кэрэ миэстэтин баһылаан турарыттан олус астыналлар, үөрэллэр, көрөллөр — истэллэр.
Быйылгы сылга бөһүөлэкпитин тыһыынчаннан сибэккилэр симиэхтэрэ, толору киэргэтиэхтэрэ диэн Сииттэ кэрэ аҥардара улахан былааннаах олороллор.
Марианна Сивцева.