Сииттэбит нэһилиэгэр ыытыллар бары үлэлэри хас биирдии киһи ситим, хаһыат, күөх экран нөҥүө бэлиэтии көрөн — истэн олороҕут. Бу барыта дойдубут сайдарын, хас биирдии киһи олоҕо тупсарын туһугар үлэлии — хамсыы сылдьар олохтоох дьаһалтабыт күннээҕи түбүгэ буоларын бары бэрткэ билэбит. Инники суруйан ааспытым курдук, Россияҕа Дьиэ кэргэн сылыгар сөп түбэһиннэрэн, дойдутун дьонугар сахалыы харысхаллаах дьиэлэр нүөмэрдэрин, Семен Тимофеев хас биирдии дьиэҕэ бэлэх гынан туттартаата.
Семен Тимофеев, Петр Степанов, Дмитрий Колмогоров уулуссаларбыт ааттарын саҥалыы уларытан ыйаатылар. Улахан үөрүүбүтүн үллэстэбит, ол курдук, нэһилиэкпит СВО-ҕа сылдьар оҕолордоох дьиэ кэргэттэргэ бастакыннан, сахалыы харысхалбыт харыстыы, араҥаччылыы турдун диэн алҕаан туран анал нүөмэрдэри бэлэх гынан ыйаатылар. Кырдьык да үчүгэй, киһи астынар бэлэҕэ эбит диэн, көрбүт дьон астына бэлиэтээтилэр уонна ис сүрэхтэн олохтоох дьаһалта баһылыгар махтаналларын биллэрдилэр.
Инникитин нэһилиэкпитигэр киһи сэҥээрэр улахан үлэлэр ыытыллыахтаахтарын туһунан иьитиннэрэбит. Онон дойдубут көхтөөх дьонун — сэргэтин ыҥырыа этибит, биирдэ бэриллэр олоххутугар, дойдубутугар буола турар ыарахан балаһыанньаҕа бас бэриммэккэ, бар дьоҥҥутугар кэрэни, сырдыгы, үтүөнү эрэ бэлэхтээҥ диэн ыҥырыахпытын баҕарабыт. Сэргэхсийэ — аралдьыйа таарыйа субботниктарга, тэрээһиннэргэ сылдьан, бэйэҕит үтүө кылааккытын киллэрсиэххит диэн эрэнэбит.
Марианна Сивцева