Россияҕа Дьиэ кэргэн сылын чэрчитинэн Сииттэбитигэр култуура дьиэтин иһинэн тэриллибит «Сайдыс» лааҕыр уолаттара «Сиэдэрэй тиэргэн» диэн ааттаах сонун тэрээһиҥҥэ сырыттылар.
Ол курдук, Сииттэбит нэһилиэгин сатабыллаах мааны хаһаайкалара, оҕуруот өлгөм үүнүүтүн кистэлэҥнэрин, дьиэ таһыгар соҕуруу дойду мастарын, сибэккилэрин, хайдах олордон, көрөн — истэн силигилии үүннэриэххэ сөптөөҕүн туһунан билиһиннэрдилэр, көрдөрдүлэр.
Тэрээһиммит бастакы хаһаайкатынан буолла Мотрена Семеновна Колмогорова. Мотрена Семеновна оҕолору үөрэ — көтө көрүстэ. Кини тэлгэһэтин иһигэр биэс араас сонун мастары олордубутун, оҕолорбутугар көрдөрө — көрдөрө, олус тиийимтиэ гына боростуой тылларынан кэпсээтэ. Сииттэбит сиригэр сирень уонна яблоня, соҕурууттан кэлбит мастар, доруобайдык үүнэн эрэллэрин көрөн оҕолор олус интэриэһиргээтилэр. Яблоня мас уһунун кытта Ньургустаан Никитин тэҥнэстэ уонна эһиил кэлэн хайаан да төһө улааппытын, уһаабытын көрүөх буолан барда. Мотрена Семеновна оҕолорго аны саас кэлэн сирень олус кыраһыабайдык сибэккилиирин кылааһынан кэлэн көрөөрүн диэн ыҥыртаата. Оҕолор астынан, махтанан, кыра да буоллар сэмэй бэлэхтэрин туттардылар.
Иккис ыалбыт — Наталья Левина. Наталья Ильинична оҕолору бэйэтэ олордубут минньигэс арбууһунан күндүлээн көрүстэ. Наталья Левина уһаайбата көрбүт эрэ киһи барыта сөҕөр кыраһыабай көстүүтэ, сибэкки ыһыаҕа ыһыллар диэтэххэ сыыспат буолуохтаахпыт. Кини үүннэрэр садовай малината Сииттэлэргэ, элбэх ыалга баарын бары билэбит. Оҕолор дьэ астына икки араас малинаны амсайан, сибэккилэргэ тиийэ сэргээн, олус сөхпүттэрин биллэрдилэр. Остуол саҕа хаппыыстаны эргийэ сылдьан хаартыскаҕа түстүлэр. Наталья Ильиничнаҕа махталбытын биллэрэн эмиэ сэмэй бэлэхпитин туттардыбыт.
Нэһилиэкпит убаастанар, ытыктанар ыалыгар Вера, Николай Павловтарга сырыттыбыт. Ыал ийэтэ, эбэтэ Вера Павлова төһө да ыарыйдар, оҕолору үөрэ — көтө көрүстэ. Дьэ уонна батыһыннара сылдьан Сангаартан аҕалбыт черемухаларын, Хаҥалас улууһуттан сакаастаан аҕалтарбыт бузина мастарын көрдөрдө, ис остуоруйаларын билиһиннэрдэ. Бааһына аҥаарынан үүннэрэр улахан хаппыысталарын, кабачоктарын оҕолор сөҕө — махтайа көрдүлэр, иһиттилэр.
Онон бу күн сылдьыбыт ыалларбытыгар үөрэ — көтө көрсүбүккүтүгэр барҕа махталбытын тиэрдэбит. Салгыы үлэ оҥостон, сиэдэрэй тиэргэннээх ыалларбытыгар сылдьар былааммыт улахан. Уолаттарбыт сатабыллаах хаһаайкаларга интэриэһиргиир боппуруостарын биэртэлээтилэр уонна диктофоҥҥа уһуларга үөрэннилэр. Билбит-көрбүт, истибит информациялара оҕолорго туһалаах буолуо диэн эрэнэбит.
Марианна Сивцева