Сииттэ нэһилиэгэр саҥа сылы көрсө » Тымныы оҕонньор бирииһигэр» аналлаах, олус бэртээхэй күрэхтэһиилэр буолан аастылар.
Ол курдук, бильярдка уонна остуол тенниһигэр нэһилиэкпит көхтөөх эр дьоно күөн көрсөн, күүс былдьаһан, ким мындыр толкуйдааҕын, ким сымса хамсаныылааҕын быһаарыстылар диэтэххэ сыыспат буолуохтаахпыт. Күрэҕи олохтоох дьаһалта уонна нэһилиэкпит ыччатын лидера көҕүлээн, тэрийэн ыыттылар. Барыта бильярд күрэҕэр 8 кыттааччы, теннискэ 9 кыттааччы кыттыыны ылла. Тыҥааһыннаах киирсии түмүгүнэн бильярдка Сииттэ орто оскуолатын 10 кылааһын үөрэнээччитэ Расулов Салим бастаата, иккис миэстэни Прокопий Степанов уонна бочуоттаах үһүс миэстэни Матвей Гуляев тиксэн үөрүүлэрэ, махталлара үгүс. Остуол тенниһигэр бастакы миэстэни Матвей Гуляев, иккис миэстэни Петр Степанов, үһүс миэстэни Сииттэ орто оскуолатын үөрэнээччитэ Салим Расулов ылыан ылла. Кыайыылаахтар бары олохтоох дьаһалта баһылыга Семен Тимофеев туруорбут иккилии тыһыынчалаах сертификаттарынан, анал суруктарынан бэлэх тутан олус астыннылар.
Нэһилиэкпит эр хоһууттарын сэргэхситээри, спортзал дьиэтигэр муста, бүгүҥҥү тэрээһин кылаабынай судьуйатынан үлэлээтэ — хамсаата Федор Петров. Киниэхэ күүс — көмө буолла олохтоох дьаһалта баһылыгын солбуйааччыта Петр Степанов.
Ити курдук, ыытыллыбыт күрэх инникитин өссө кэҥииригэр, кыттааччыта элбииригэр баҕа санааларын тиэртилэр. Өссө төгүл күрэх кыайыылаахтарын итиитик — истиҥник эҕэрдэлиибит!
Марианна Сивцева.