Саҥа сылы көрсө

Биһиги, сахалар бэйэбит итэҕэлбитинэн оҥоһуллубут халандаарбытынан, саҥа сыл бэлиэтинэн Айыыһыт сыла буолар. Онтон илиҥҥи дойдулар бэлиэлэринэн — Дракон сыла уруйданар-айхалланар.

Саҥа 2024 сылы көрсө Кэбээйитээҕи «Сайдам» сынньалаҥ киинигэр «Саҥа сылга — сырдык дьолу!» диэн бырааһынньыктааҕы эҕэрдэ кэнсиэринэн саҕаланна. Бука бары «Сказочный мир Востока» остуоруйа алыптаах эйгэтигэр ыалдьыттаатыбыт. Манна синньигэс бииллээх, көрүөхтэн кэрэ, нарын — намчы кыргыттар үҥкүүлээн киэргэттилэр.

 

Араас уотунан күлүмүрдүүр күөх харыйа тула араас маскараадтар Тымныы оҕонньору, Хаарчаананы, Саҥа дьылы кытта ыллаатылар — туойдулар, үҥкүүлээтилэр — көттүлэр, бэлэхтэри тутан махтаннылар. Остуоруйа сүрүн оруолун толорооччу Уотунан уһуутуур Дракон саҥа саҕахтары арыйарга, кыайыыны — хотууну эрэннэрдэ.
Бу курдук, Айыыһыт сылыгар Иэйэхсиппит аттыбытыгар сылдьан арыаллыы — харыстыы сырыттын!

Венера Лугинова.