Кэбээйи улууhун Сайылык нэhилиэгэр «Эр Хоһуун — 2024» бэрт сэргэх тэрээһин буолан ааста. Муҥур Күөл балаһааккатыгар дьон-сэргэ күрэх көрөөрү тоҕуоруһа муһуннулар, атыы-эргиэн дьаарбаҥката тэрилиннэ.
Бу күрэххэ түөрт хамаанда: убайдар бырааттарын кытта кытыннылар — Андросовтар, убай Николай быраатынаан Афонялыын. Гуляевтар, убай Ньургун быраатынаан Климныын. Саввиновтар, убай Айсен быраатынаан Толялыын уонна Арыылаахтан кэлбит Каримовтар, убай Степан быраатынаан Аликтыын кытыннылар.
Бары да, сүрдээх уопуттаах убайдар, бырааттар буолан биэрдилэр. Күрэх түһүмэҕин аайы түмүк тахсан, кыайыылаахтарга мэтээлинэн уонна грамотаннан наҕараада туттарылынна.
Ол курдук, «Бэрэбинэни суорааһын» диэн бастакы түһүмэххэ, бэрт сатабыллаах Каримовтар бастаатылар, иккис миэстэни Андросовтар, үсүһү Гуляевтар ыллылар.
Иккис түһүмэх «Бэрэбинэни эрбээһин» буолла. Бу түһүмэххэ Каримовтар бастаатылар, иккис Саввиновтар, үһүс Андросовтар буоллулар.
Үһүс түһүмэх «Саһаан маһын бэлэмнээһин». Бу түһүмэххэ түргэн-тарҕан туттуулаах Каримовтар бастаатылар, иккис Гуляевтар уонна үһүс миэстэни Андросовтар ситиһиилээхтик ыллылар.
Төрдүс «Кутаа уокка чэй өрүүтэ» түһүмэххэ хамаандалар уот оттон, чэй өрдүлэр. Бу манна кырдьык да, маһы эрдэ хайытан бүппүт, уот оттубут киһи хоторо биллибэт эбит. Чэй оргуйуута, бу хамаанда хайдах маһын ууруутуттан, тыал ханан үрэрин билэн таба туһаныытыттан, маһын төһө чараастык хайытарыттан, уулаах биэдирэтин сиртэн төһө үрдүккэ ыйыырыттан улахан тутулуктаах буолан көрөөччүлэри да, кыттааччылары да долгутта. Бастакы миэстэни бу түһүмэххэ Каримовтар, Гуляевтар иккис уонна Андросовтар үһүс буоллулар.
Бүтэһик түһүмэх дьон болҕомтотун тарпыт «Биатлон». Дьэ онно ыһыылаах, хаһыылаах ыалдьааһын буолта. Хайыһарынан сүүрэн тиийэн сыал ытыытыгар кыраҕы харахтаах Каримовтар бастаатылар. Иккис миэстэни Гуляевтар ыллылар. Үһүс миэстэҕэ Андросовтар буоллулар.
Онон «Эр Хоһуун — 2024» күрэх түмүгүнэн бастакы миэстэни туох да мөккүөрэ суох Арыылаахтан кэлбит Каримовтар хамаандалара ылан, кыайыылаах кубогын, Добун суругун, Аҕа Баһылык Анал бирииһин тутан, кыайыы өрөгөйүн биллилэр. Иккис миэстэни Гуляевтар ыллылар. Үсүһү Андросовтар хамаандалара ситиһиилээхтик ыллылар. Саввиновтар «Кыайыыга дьулуурун иһин» анал аат хаһаайыттара буоллулар.
Бу күүстээх, тыҥааһыннаах күрэх кэмигэр көрөөччүлэргэ, ыалдьааччыларга И.Ф. Гуляева, Р.М. Данилова, Л.О. Лазарева уонна «Кэнчээри» уһуйаан үлэһиттэрэ (сал. С.Г. Стрекаловская) итии чэй, кофе уонна ас эгэлгэтин, шашлык минньигэһин атыылаан, кэлбит дьон үөрэ-көтө атыыластылар. Ону сэргэ кырачаан көрөөччүлэргэ «Дайан» сынньалаҥ киин үлэһиттэрэ тэттик күрэхтэри, оонньуулары тэрийдилэр.
«Кэнчээри» уһуйаан иһинэн тэриллибит «Хоһуун» түмсүү нэһилиэкпитигэр маннык күрэхтэри тэрийбитэ оруобуна 5 сыла буолла. Кэнники икки сылларга аҕа баһылык Николай Иванович Левин өйөөн, тэрээһин Олохтоох дьаһалтаны кытта бииргэ тэриллэр буолла. Онон бу үбүлүөйдээх тэрээһиммитинэн түмсүү кыттыылаахтарыгар, Иванова Марина Серафимовнаҕа, Софронеева Розалия Андреевнаҕа, Жиркова Матрена Алексеевнаҕа, Сидорова Лилия Ивановнаҕа аҕалары кытта үлэлэрин үрдүктүк сыаналаан туран, нэһилиэк аҕа баһылыгын аатыттан махтал суруктар туттарылыннылар. Ону сэргэ, күрэҕи бэрт сэргэхтик ыытан көмөлөспүт аҕабытыгар Юрий Владимирович Волковка махтал сурук туттарылынна.
Бу күн тэрээһин судействотыгар уол оҕону иитиигэ бэйэлэринэн холобур буолар, көхтөөх, актыыбынай аҕалар: Павлов Юрий Николаевич, Жирков Егор Николаевич, Софронеев Афанасий Иванович, Иванов Иннокентий Иннокентьевич уонна Хоһуун түмсүүгэ мэлдьи күүс-көмө, өйөбүл буолар биир дойдулаахпытыгар Егор Афанасьевич Андросовка СӨ «Аҕалар лигалара» уопсастыбаннай тэрилтэ салайааччыта Айхал Габышев бочуотунай грамотынан наҕараадаланнылар. Эдэр аҕа Николай Адольфович Андросов Махтал суругунан наҕараадаланна.
Тэрээһиҥҥэ күүс-көмө буолбут «Хапсаҕай түһүлгэтин» салайааччытыгар Михаил Васильевич Ивановка улахан махталбытын тиэрдэбит. Сылын аайы күүс-көмө буолар спонсордарбытыгар урбаанньыттарга Дария Николаевна Кычкина, Григорий Степанович Борисов, Валерий Петрович Ксенофонтов, Татьяна Ивановна Николаева, Олохтоох дьаһалта Аҕа баһылыгар Николай Иванович Левин, СУ ВРЭС коллективыгар (салайааччы Прокопий Николаевич Павлов), Танара орто оскуолатыгар (директор Евгений Петрович Эверстов) улахан махталбытын тиэрдэбит. Маны таһынан биирдиилээн дьон бэйэлэрин анал бириистэрин туттаран, дьон биһирэбилин ыллылар. Ол курдук, Григорьевтар дьиэ кэргэн таайдарын Виктор Петрович Каратаев аатынан анал бириистэрин Саввиновтар хамаандаларыгар туттардылар. Прокопьевтар дьиэ кэргэн Бастыҥ от охсооччу, байанайдаах булчут, бастыҥ сылгыһыт Николай Михайлович Прокопьев аҕаларын аатын үйэтитэн анал бириистэрин Гуляевтар хамаандаларыгар туттардылар. СӨ үлэ бэтэрээнэ, СӨ спордун бэтэрээнэ, РФ көҥүл тустууга спорт маастара, Кэбээйи улууһун Бочуоттаах олохтооҕо Иванов Серафим Иванович аатынан анал бирииһи уола Иванов Д.С Каримовтар хамаандаларыгар туттарда. СУ ВРЭС коллективын бирииһэ кыайыыга дьулуурдаах Саввиновтар хамаандаларыгар туттарылынна.
Танара орто оскуолатын анал бириистэрэ Саввиновтарга туттарылынна. Оскуола интернат үлэһиттэрэ бириистэрэрин Каримовтарга туттардылар. Ону сэргэ, Хоһуун түмсүү салайааччыта Е.Е. Егорова кыттыбыт уол оҕолорго барыларыгар сэмэй бэлэҕин туттарда.
Түгэнинэн туһанан, күрэҕи көрө-истэ, убайыгар өйөбүл буолан кэлэ сылдьыбыт Виктор Каримовка эҕэрдэбитин тиэрдэбит. Виктор уолунаан Айыллаанныын Өрөспүүбүлүкэ үрдүнэн ыытыллыбыт «Аҕа уолунаан-2024» күрэххэ Кэбээйи улууһун аатын үрдүктүк сүгэн ситиһиилээхтик кыттан кэлбиттэрэ. Мэлдьитин да маннык уолугар үтүө холобур буолар эдэр аҕаҕа ситиһиилэри баҕарабыт!
Нэһилиэкпит эр дьоно, мэлдьи эр санаалаах, активнай позициялаах буолуҥ диэн ыҥырабыт!
«Хоһуун» түмсүү.