Саха Өрөспүүбүлүкэтин Ил Дархана Айсен Николаев балаҕан ыйын 7 күнүгэр 2023 сыллаахха Оһуохай күнүн олохтуур туһунан Ыйаахха илии баттаабыта. Ыйаах Арассыыйа норуоттарын култуураларын үйэлээх баайын эбийиэгин – саха төрүт үҥкүүтүн «Оһуохайы» харыстыыр уонна тарҕатар соруктаах. Оһуохай күнэ — ыам ыйын 25 күнүгэр сыл ахсын бэлиэтэнэр буолбута.
Бүгүн Сииттэбит нэһилиэгэр «Эйээр эрчимнээх эһиэкэйим, дуорай ойор оһуохайым» диэн ааттаах «Оһуохай» күнүн бэлиэтээтибит. Олохтоох сынньалаҥ киин үлэһиттэрэ, «Чуораанчык» уһуйаан кэллэктиибэ, олохтоох библиотека, «Алаһа» эбээлэр ,»Иэйии», ийэлэр түмсүүлэрэ, алын сүһүөх кылаас учууталлара оһуохайга кыттыыны ыллылар. Култуура үлэһитэ Евдокия Охлопкова Оһуохай күнүн киирии тылынан арыйда, эҕэрдэтин тиэртэ. Библиотека үлэһитэ Мария Обутова оһуохай тутулун, суолтатын туһунан билиһиннэрдэ.Учуутал -краевед Анна Сивцева мустубут дьоҥҥо сайыҥҥы күөххэ үктэммиппитинэн, эбэлэрбит этэҥҥэ ааспыттарынан, убаастыыр киһибитигэр Эдьиий Дораҕа махтанан эҕэрдэтин тиэртэ, кылгастык уһуйаан тиэргэнигэр турар сахалыы оҥоһуулаах сэргэ устуоруйатын сэһэргээн ааста. «Алаһа» эбээлэр түмсүүлэрин салайааччыта Матрена Васильева ыччаттарга туһаайан оһуохайы сэҥээрэллэригэр, үөрэтэллэригэр баҕа санаатын тиэртэ. Матрена Лазаревна эдэриттэн нэһилиэгэр оһуохайдьыт быһыытынан биллэр. Кини быйыл оһуохай эппитэ 40 сылын туолар.
Салгыы Матрена Лазаревна мустубут дьону, оҕолору оһуохайга ыҥыран, төгүрүччү туран оһуохай этиитэ саҕаланна.Кырачаан этээччи Надя Сметанина, 2 кылаас үөрэнээччитэ, чуор куолаһынан ыллаан- туойан мустубут дьон сэҥээриитин ылла. Салгыы оһуохайга Диана Слепцова, Марианна Захарова уонна Матрена Васильева дьиэ -кэргэнин үс көлүөнэтэ оһуохайы оройуттан туттулар.
Ити курдук, сайыҥҥыллыы сылаас, аламай күн үүнэн, күн уота чаҕылыйа тыган санаабытын өрө көтөхтө. Оҕо- аймах үөрүүтүнэн, күлүүтүнэн бүгүҥҥү Оһуохайбыт күнүн көрүстүбүт, эһиэкэйдээн эйээрдибит, оһуохайдаан ойдубут.
Мария Обутова, Сииттэ нэһилиэгэ.