Куйаар ситимиттэн сонуну, саҥаны, туһалааҕы эмиэ ааҕыахха, билиэххэ, сэргиэххэ сөп. Ол курдук, бэҕэһээ «кыһыл хаптаҕас атыыланар» диэн биллэрии ватсап бөлөххө тирилээн кэлбитин хойутуу көрөммүн хаптаҕастаныах киһи куоттаран кээстим. Дьэ, уонна туоһулаһааччы буоллум. Онтум Кэбээйи нэһилиэгэр олорор Данил уонна Анна Дьяконовтар игэрэ сиэннэрэ уолаттар сир астаан оскуолаҕа киирэн үөрэнэр тэриллэрин тэринээри атыылыыллар эбит. Уолаттары эбээлээх эһээлэрэ кыраларыттан бүөбэйдэһэн оскуолаҕа киллэрэн үөрэттэрэ сылдьаллар. Уолаттар билигин 9 саастаахтар. Эрсаннаах Арылхан чоп-чобуо дьон буолан биэрдилэр: «Эрсан 4 саастааҕыттан, мин 5 сааспыттан сир астыырга үөрэммиппит», — диэн кыра уол кэпсиир. «Биһиги дьиэ ис-тас үлэтин барытын сатыыбыт. Эбээлээх эһээбит үөрэппиттэрэ. Кыһын тэлгэһэ күрдьэбит, муус киллэрэбит, хаар баһабыт. Саас тэлгэһэ ыраастаһабыт, хортуоска, үүнээйи олордуһабыт»,- диэн Эрсан кэпсиир.
Эбэлэрэ Анна Семеновна нэһилиэккэ кыһыҥҥы, сайыҥҥы сибэккилэри, үүнээйилэри олордорунан тэҥнээҕэ суох. «Сиэннэрбитин кыра саастарыттан үлэҕэ такайаммыт билигин лаппа туһа дьоно буоллулар. Хортуоскаҕа, үүнээйигэ сыыс оту көрдөрбөттөр. Табыгыратан кээһэллэр. Сир аһыгар эһэлэрин кытта барсаллар. Сир астыырга анааммын анал биэдэрэ өссө кыра эрдэхтэринэ ылаттаабытым», — диир Анна Семеновна.
Дьэ, онон Эрсан, Арылхан Дьяконовтар кыһыл хаптаҕаска эбии сакаас киирэн үөрэхтэрин тээбиринин ыларга туруммуттар. «Ийэлэрэ дьиэтин-уотун да төлөбүрүгэр сөп буолар. Ону оҕолорум өйдүүллэр»,- диир эбэлэрэ.
Аныгы үйэ оҕото бэрт ахсааннаах итинник тэринэн үөрэххэ бэлэм буолара буолуо диэтэхпинэ сыыспатым буолуо. Эрсаннаах, Арылхан үөрэххэ, үлэҕэ дьулуурдаахтар диэн эбии үтүө сураҕы иһиттим. Үөрэҕи таһынан саахымакка дьарыктаналлар эбит.
Онон «чэ бээ, оҕом кыра, улааттаҕына үлэлии үөрэниэ», — диэн өйдөбүл сыыһата чуолкай эбит.
Татьяна Максимова-Лазарева