Сииттэ нэһилиэгин тэрилтэлэрэ ытык кырдьаҕастарыгар улахан болҕомто уураннар, махтал тыл бастыҥын туттулар. Буоларын курдук тэрилтэлэр бэлэх эрэ туттарыытынан муҥурдамматылар. Нэһилиэкпит социальнай харысхалын эдэр үлэһитэ Елена Васильева, сахалыы баахыла астаан, көрөр — истэр дьонун күндүлээтэ. Этэргэ дылы киһиэхэ кыра да болҕомто наада. Эдэр киһи үлэтин — хамнаһын баһылаан эрэрэ көстөр. Олохтоох дьаһалта (баһылык Семен Тимофеев) шефтэһэр кырдьаҕастарыгар Вера Оконешниковаҕа анаан, сылааһынан илгийэр сэлиэччик бэлэх ууннулар, кырдьаҕас наһаа үөрдэ, махтал тыл алгыһын анаата. Олохтоох балыыһа коллектива, сэбиэдиссэй Алина Павлова медсиэстирэ Татьяна Герасимовалыын кырдьаҕастарын кэрийэн, доруобуйаларын көрдүлэр — иһиттилэр. Уһун кэмнэргэ шефтэспит, өр сылларга доруобуйа харыстабылыгар үлэлээбит Татьяна Обутоваҕа сэмэй бэлэхтэрин, эҕэрдэлэрин тириэртилэр . «Чуораанчык» детсад коллектива (сэбиэдиссэй Ольга Павловна) элбэх оҕо, сиэн эйэҕэс эбэтигэр Вера Павловаҕа бырааһынньыктааҕы бэлэхтэрин туттаран, махтал тыл истиҥин туттулар. Нэһилиэкпит саамай улахан коллективтаах, үөрэх — билии сырдык аартыгар сирдиир (директор Андрей Новгородов) билигин ыраах, куоракка оҕолоругар олорор ытык кырдьаҕастарыгар видеопоздравление устан ыытаннар ис сүрэхтэн долгуттулар. «Сахаэнерго» (начальник Александр Сивцев) нэһилиэкпит аарыма кырдьаҕаһыгар Николай Павловы эҕэрдэлээтилэр. Сииттэбит нэһилиэгэр, биир көхтөөх тэрилтэннэн газ үлэһиттэрин үөрэ — көтө ааттыыбыт. Кинилэр Николай Каратаевы кытта шефтэспиттэрэ ыраатта, ханнык да кэмнэргэ өрүү күүс — көмө буолар чугас дьонноро.
Ити курдук ытык кырдьаҕастар күннэрэ бэрт сэргэхтик, тэрээһиннээхтик ааста. Бырааһынньыкка бэрткэ сэргэхсийдибит диэн кыра оҕолуу үөрдүлэр — көттүлэр, ытык — мааны кырдьаҕастарбыт!
Марианна Сивцева