Мукучубут нэһилиэгэр Олунньу 5 күнүгэр, Аҕа дойдуну, Ийэ сири көмүскээччилэр сылларын чэрчитинэн ыытыллар «Күүстээхпин, кыахтаахпын…» уһуйаан уонна алын кылаас уолаттарыгар анаммыт кустовой күрэх быйыл 9-с төгүлүн буолан ааста. Күрэххэ уопсайа 16 эмдэй-сэмдэй уолаттар күүстэрин-кыахтарын холостулар. Сэрээккэттэн саҕалаан 6 түһүмэххэ илин-кэлин түһүстүлэр. Ол курдук байыаннай таҥаһы таҥныы, отжимание, тимэх тигии, Корнхол оонньуу, ырааҕы ыстаныы, хааһы сиэһинэ бэрт тыҥааһыннаах буолла.
Эркин курдук эрэнэр, дурда-хахха буолар аҕаларбыт, эрчимнээх убаайдарбыт кэлэн уолаттарбытыгар ыалдьан, кыайыыны түстээтилэр. Күн күбэй ийэлэр, кылаас салайааччылара истиҥ сүбэлэрэ уолаттарга күүс-уох эптэ.
Бэртээхэй тэрээһин уһуйаан уонна маҥнайгы кылаас сүһүөх кыттааччыларыгар үһүс миэстэни Мастаах нэһилиэгин 17 нүөмэрдээх «Чуораанчык» уһуйаанын иитиллээччитэ Яков Павлов, иккис миэстэни Мукучу нэһилиэгин 15 нүөмэрдээх «Кэнчээри» оҕо уһуйаанын иитиллээччитэ Артем Чириков уонна маҥнайгы миэстэни И.Е.Левин аатынан тус предметтэри дириҥэтэн үөрэтэр Танара орто оскуолатын маҥнайгы кылааһын үөрэнээччитэ Сеня Иванов буолан, боруонса, үрүҥ, кыһыл көмүс мэтээллэри түөстэригэр кэтэн үөрүүлэрэ үксээтэ. Онтон 2-4 кылаастарга диэри сүһүөх кыттааччыларга И.Е.Левин аатынан тус предметтэри дириҥэтэн үөрэтэр Танара орто оскуолатын үһүс кылааһын үөрэнээччитэ Костя Андросов үһүс миэстэни, төрдүс кылаас үөрэнээччитэ Эльдар Стрекаловскай иккис миэстэни уонна Баҕадьа нэһилиэгиттэн 4 кылаас үөрэнээччитэ Сеня Михайлов маҥнайгы миэстэ буолан, боруонса, үрүҥ, кыһыл көмүс мэдээли түөстэригэр кэтэн күлүмнэтэ оонньооттулар. Бука бары күрэх кыттыылаахтарыгар туоһу суруктар, грамоталар, минньигэс сахалааттар, нэһилиэктэр түөлбэлэрин бэлэхтэрин күндүлүү ууннуллар. Кыайыы өрөгөйүн хаартыскаҕа түһэн үйэтиттилэр.
Быйылгы Улуу Кыайыы үбүлүөйдээх 80 сылын көрсө ыытыллыбыт күрэх, кыра саллааттарбыт бэйэлэрин тэҥнээхтэригэр ситиһии көтөллөөх, кыра эрдэхтэриттэн күүстээх, кыахтаах, ийэ дойдуларын таптыы, бэриниилээх буола улааталларыгар тирэх буолар. Уолаттар эһиил онус төгүлүн ыытыллар күрэххэ ох курдук оҥостон, өссө күүскэ эрчиллэн кэлэргэ бэлэммит диэн тарҕастылар.
Кыра саллааттарбыт чэгиэн туруктаах, бигэ тирэхтээх, баҕа санааҕыт хоту сырдыкка, үрдүккэ дьулуһуҥ, кыайыыга эрэллээх буолуҥ!
Вера Прокопьева, Мукучу
