Тохсунньу ый 11 күнүгэр РФ Аҕа дойдуну көмүскээччи уонна СӨ Ийэ дойдуну көмүскээччи сылынан биллэриллэн патриотческай иитиигэ сүрүн болҕомто ууруллара уһуйааннарга түстэннэ. Ол курдук бу күннэргэ Титова Антонина Степановна салайааччылаах «Волонтеры Туймаады» уопсастыбанай тэрилтэ уонна Ефремова Лена Павловна салайааччылаах «Российская семья» региональнай отделения быһаччы кыттыытынан уонна өйөбүлүнэн «Дети-волонтеры» хамсааһын республикатааҕы «Туллук-символ мира и добра» форума буолан ааста. Форумҥа Кэбээйи н. «Мичээр» оҕону сайыннарар киинин иитээччилэрэ кыттыыны ыллылар. Санатан эттэххэ Лена Дмитриевна Троева-Лугинова салайыытынан «Дети-волонтеры» республикатааҕы хамсааһын ааспыт сыл алтынньы ыйыттан айанын саҕалаабыта. Билигин бу хамсааһыҥҥа республика уһуйааннара улгумнук киирэн эрэллэр.
Оскуола иннинэ саастаах оҕолору иитэр үөрэтэр иитээччилэр инники кэмнэргэ анал дьайыыга баҕа өттүлэринэн уһуйаан иһинэн бырайыак айан үлэлии олорбут буоллахтарына билигин суоллара-иистэрэ ырылыччы көстөр буолла.
Форумҥа ыҥырыылаах ыалдьыттарынан буоллулар Россия героя Филипп Александрович Евсеев кэргэнинээн Светлана Александровналыын, «Якутия с тобой» ресурснай киин солбуйааччы салайааччыта Ефимова Анна Николаевна.
«Туллук-символ мира и добра» бырайыакка волонтер оҕолору кытта үлэлииргэ ыйдарынан былаан бу сыл устатыгар ыйылынна. Үлэ-хамнас барыла киэҥ, оҕолору патриотическай иитиигэ туһуламмыт былаан улахан көмө буолара чахчыта чопчуланна.
«Мичээр» оҕону сайыннарар киин иитээччилэрэ Терехова Ирина Васильевна уонна Кобякова Анна Петровна 2023-24 үөрэх дьылыгар үлэлэммит «Дети-волонтеры» барыл (ааптардар Максимова Т.Д., Терехова И.В.) үлэтин форум кыттыылаахтарыгар кэпсээтилэр, уопуттарыттан атастастылар. «Якутия с тобой» ресурснай киин салайааччыта Анна Ефимова Кэбээйилэр волонтердара уонна кырачааннара байыаннай дьайыыга болҕомтолорун күүскэ хатыылларын тоһоҕолоон бэлиэтээтэ уонна Махтал сурук туттарда.
Форум түмүгүнэн республика уһуйааннара патриотическай иитиигэ туһуламмыт үлэни сыалын-соругун ситиһэрдии санаалаах тарҕастылар.
Форум кэнниттэн Ирина Васильевна уонна Анна Петровна «Мичээр» уһуйаан иитиллээччилэрэ оҥорбут сухой армейскай душтарын уонна байыастарга анаан суруйбут суруктарын итиэннэ «Үтүө түгэн» волонтерскай түмсүү Москва госпиталыгар анаан оҥорбут баһыылкаларын туһааннаах пууннарга туттардылар.
Онон Кэбээйи улууһугар оскуола иннинэ саастаах оҕолору ийэ дойдуга бэриниилээх буолууга иитии үлэтэ өссө сытыырхайда.
Татьяна Максимова-Лазарева