Оҕо баар буолан сир симэнэр,
Оҕо баар буолан дьон дьоллонор,
Оҕо баар буолан олох салҕанар.
Бэс ыйын 1 күнүгэр биһиги нэһилиэкпитигэр Норуот айымньытын дьиэтин иннигэр Оҕо көмүскэлин күнүгэр аналлаах бырааһынньык буолан ааста. Ол курдук, Арассыыйаҕа Дьиэ кэргэн, Саха сиригэр Оҕо саас сылларыгар аналлаах «Саҥа талааннар, саҥа ааттар» бэстэбээл иккис туура буолан ааста. Бу бэстэбээли норуот айымньытын үлэһиттэрэ көҕүлээн Мастаах орто оскуолатын алын, орто сүһүөх оҕолоругар анаан ыыттылар. Бэстэбээл сүрүн сыала-соруга оҕо талаанын арыйыы, киэҥ эйгэҕэ таһаарыы. Ыытааччы, ырыа, үҥкүү, хоһоон, фольклор, сахалыы муода көрүҥнэрэ киирдилэр. Күрэс буолан баран дьүүллүүр сүбэтэ суох табыллыбат. Н.П. Егоров аатынан Мастаах орто оскуолатыттан Дария Николаевна Кононова, 2-с Лүүчүн баһылыгын солбуйааччыта Архипова Степанида Январьевна, Аина Иннокентьевна Спиридонова норуот айымньытын дьиэтин методиһа. Сүрүн болҕомто бу күрэскэ ууруллар оҕо тыла-өһө, сыанаҕа туттара-хаптара, талаанын айар дьоҕурун сыаналааһын.
Күрэҕи иилээн-саҕалаан ыытта Саха Өрөспүүбүлүкэтин Култууратын туйгуна Дария Степанова. Күрэхпит саамай долгутуулаах түгэнинэн ыытааччылар түһүмэхтэрэ буолла.
Ол курдук, ыытааччылар тахсан эҕэрдэ тылларынан бар дьоннорун, оҕолору Оҕо көмүскэлин күнүнэн саҥаран-иҥэрэн эҕэрдэлээтилэр. Оҕолорбут бука бары даҕаны бэлэмнээхтэрин көрдөрдүлэр. Хоһоон, ыытааччыны бэлэмнээһиҥҥэ ылсан үлэлэстэ Дария Степанова. Үҥкүүнү туруорда Норуот айымньытын дириэктэрэ Ариан Дьяконов. Ырыаны, фольклору бэлэмнээтэ Мукучутааҕы оҕо ускуустубатын уһуйааччыта Сардана Жакипова. 1 кылаастар кылаас салайааччыта Оксана Николаевна Афанасьева. Күрэхтэһиигэ чохчоохой үҥкүүнэн, ахсаан чабырҕаҕынан, сахалыы муоданан кытыннылар. Бу оҕо-аймах бырааһынньыгынан Мукучуттан Эрчимэн Яковлев ырыатын бэлэх уунна. Саша Семёнов Егор Андросов «Ыллаа, ыллаа күөрэгэй» ырыанан бар дьонун үөртэ. Оҕолорбут дьоҕурдарын, талааннарын биһиги көрөөччүлэр көрөн долгуйдубут, үөрдүбүт. Дьүүллүүр сүбэ түмүгүн таһаарыар диэри Дария Степанова култуура сонуннарыттан сырдатта. Дьэ эрэ, «Саҥа талааннар, саҥа ааттар» хаһыс кылаастар кыайбыттара буолуой?
Ол курдук, инники кыттыбыт кылаастар наҕараадаларын туттардылар.
1 миэстэ — 4 кылаас кэлэктиибэ;
2 миэстэ – 6 кылаас кэлэктиибэ;
1 миэстэ — 2 кылаас кэлэктиибэ;
2 миэстэ — 3 кылаас.
Түмүккэ оҕолорго бука барыларыгар анаан ыраас халлааннаах чаҕылхай күннээх дьоллоох оҕо сааһы баҕарабыт. Бу бэстэбээл салгыыта күһүн салҕанар. Сардана Константиновнаҕа, Дария Николаевнаҕа, Ариан Вадимовичка оҕолорбутун кытта наһаа үчүгэйдик ылсан үлэлээбиккитигэр төрөппүттэр ааттарыттан махтанабыт.
Сардаана Жакипова, Мастаах бөһ.