Николай Петрович Егоров аатынан Мастаах орто оскуолата XV-с төгүлүн улуустааҕы өбүгэ оонньуутун ахсынньы 8-9 күннэригэр «Лүүчүн оонньуулара» күрэх ыытылынна. Бу күрэскэ 2007-2008 с., 2009-2010 с. төрүөх кыргыттар уонна уолаттар кытыннылар. Дьэ кимнээх кэлэн күөн көрүстүлэр диэн ыйытар эбит буоллаххытына Тыайаттан, Чагдаттан, Арыктаахтан, Баҕадьаттан, Лүксүгүнтэн, Мукучуттан кэлэннэр күрэҕи өссө күүркэттилэр. Ол курдук, 2007-2008 сыллаах төрүөх оҕолорго 17 оҕо кытынна. 2009-2010 сыллаахтараг оҕолорго 16 оҕо күөн көрүстүлэр. Күрэхпит икки күн ыытылынна. Маҥнайгы күн үс төгүл үс, хапсаҕай көрүҥнэрэ бэрт сэргэхтик ааста. Сахалыы төрүт оонньуулары сайыннарарга, саха оҕото эт-хаан өттүнэн сайдарыгар туһалаах буолуо диэн ыыталлар. Бу өбүгэбит оонньуулара сымса, сылбырҕа, түргэн-тарҕан туттуулаах, тулуурдаах, имигэс буоларга көмөлөһөр.
Иккис күҥҥэ сарсыардаттан оҕолор тутум эргиир, мас тардыһыы, ыараханы көтөҕүү көрүҥнэригэр күрэхтэстилэр. Кыргыттарга хабылык, хаамыска күрэҕэ буолбута. Дьэ кимнээх, хаһыс буолбуттарын эһиэхэҕэ билиһиннэриэм. Дьэ икки күн түмүгүнэн кыргыттартан саҕалаатахха:
1 миэстэ — Чемчоева Алгыстаана (Мастаах)
2 миэстэ — Ноговицына Лидия (Арыктаах)
3 миэстэ — Ноговицына Сайаана (Мастаах )
Уолаттарга 2009-2010 с. төрүөхтэргэ:
1 миэстэ — Иванов Арылхан (Мастаах)
2миэстэ — Кононов Олег (Мукучу)
3 миэстэ — Алексеев Саня (Мастаах)
2007-2008 с. уолаттарга:
1 миэстэ — Гуляев Эльдар (Мастаах )
2 миэстэ — Дмитриев Антоний (Мастаах)
3 миэстэ — Кейментинов Тимир (Мастаах)
Ити курдук күрэхтэһии түмүгэр муҥутуур кыайыылаахтарынан буоллулар Мастаах орто оскуолатын үөрэнээччилэрэ Чемчоева Алгыстаана, Иванов Арылхан, Гуляев Эльдар тренердэрин Николай Николаевиһы уонна төрөппүттэрин эҕэрдэлиибит. Бу күрэҕи тэрийбит, тэрийсибит, күүс-көмө буолбут харчынан көмөлөспүт Мастаахтан төрүттээх бар дьоммутугар улахан махталбытын тиэрдэбит. Бу күрэх ыытылларыгар бары биир сомоҕо буолан хас биирдии үлэһит, тэрилтэ бука бары өйөөтүлэр. Успуорт биһиги бөһүөлэккэ сайдарыгар төһүү күүс бары буолаллар. Саха төрүт оонньуулара өссө да сайда турдун, оҕолорго кэлэр сыл кэрэни кэрэһэлээтин, үтүөнү үксэттин, ситиһии сиэттистин, өрөгөй күннэр тосхойдуннар!
Сардана Жакипова, Мастаах бөһ.