«Биһиги киһибит кырата бэрт» дэһэҕит. Онтон Кэбээйи «Мичээр» оҕону сайыннарар киин 2-3 эрэ саастаах «Күнчээн» бөлөҕүн иитиллээччилэрэ үтүө санаа акцияларыгар харса суох кытталлар. «Күнчээн» бөлөхтөр сырдык уйаларын өҥөйөн көрүөххэ эрэ.
Өрөспүүбүлүкэҕэ биллэриллибит «Разделяя-сохраняем» фестивальга Кэбээйи орто оскуолата кыттар санаалаах «Добрые крышечки», «Сдай батарейку – спаси планету!» экологическай акциялары биллэрбитигэр «Күнчээн» иитээччилэрэ кырачааннарын кытыннардылар. Ол түмүгэр, 110 устуука утах хаппахтара, 89 туһатыттан тахсыбыт батарейкалар хомуллан орто оскуолаҕа илдьэн туттарылынна.
Аны маны таһынан «Күнчээннэр» өбүгэлэрин үгэһин сөргүтэн, сылгы кылыттан кып-кырачаан ытыстарын дуомугар эрийэннэр, иитээччилэрин болҕомтолорунан түү мээчик оҥороллор. Кинилэр кыттыспыт ити оҥоһуу мээчиктэрэ массажер буолан анал дьайыыттан эмсэҕэлээн кэлэн Москуба куорат госпиталыгар эмтэнэ сытар биир дойдулаахтарыгар тиийэрин билбэттэр. Кыралара бэрт буоллаҕа. Ол эрэн, кырачааннар илиилэрин иминэн, тарбахтарынан таарыйбыт мээчиктэрин Кэбээйи волонтердара иилээн-саҕалаан дойду тэбэр сүрэҕэр «Сахаволонтер» түмсүү көмөтүнэн тириэрдиэхтэрэ.
Чэ кырачааннар, баҕар буоллун, дьиҥ ис хоһоонун ырыҥалаан өйдөөбөттөр, ол гынан баран иитээччилэр оҕону үтүөҕэ-кэрэҕэ, болҕомтолоох буолууга такайа үөрэтиилэригэр бэйэлэрин суоллара-иистэрэ ньымалара буолар.
Татьяна Максимова-Лазарева