Кыайыы күнүн көрсө култуура бэтэрээннэригэр — Анна Ильинична Трифоноваҕа, СӨ култууратын үтүөлээх үлэһитигэр — Савелий Николаевич Тимофеевка анал бадааракпытын туттардыбыт. Кыайыы — ийэ, оҕо, дьиэ кэргэн үөрүүтүн үксэппит, өрөгөйүн улаатыннарбыт, төлөннөөх тыл, араас өҥүнэн оонньообут Кыайыы салюта чаҕыллыбыта 79 сылын Кэбээйи нэһилиэгэр үөрэн-көтөн туран бэлиэтээтибит.
Өйдөбүнньүк пааматынньыкка Кыайыы күнүгэр аналлаах миитини Кэбээйитээҕи орто оскуолатын үөрэнээччилэрин хоһооннорунан аһылынна. Тэрээһиҥҥэ — нэһилиэкпит дьаһалтатын баһылыга — Илья Левин, нэһилиэкпит ветераннарын советын бэрэсэдээтэлэ — Егор Павлов, бойобуой дьайыы бэтэрээнэ — Владислав Обутов,оскуола 11 кылааһын туйгун үөрэнээччитэ – Стас Максимов эҕэрдэ тылларын анаатылар. “Юнармия” – байыаннай-патриотическай иитии үөрэнээччилэрэ ”строевай хаамыыларын” көрдөрдүлэр. Сэриигэ баран өлбүт буойуннарбытыгар үйэлэртэн-үйэлэргэ, көлүөнэттэн-көлүөнэҕэ өлбөөдүйбэт өйдөбүл буоллун диэн өйдөбүнньүк гирлянданы кэнчээри ыччаттарбыт уурдулар.
Тэрээһиммит иккис чааһыгар тыыл бэтэрээннэригэр, сэрии сылларын оҕолоругар аналлаах “Ааспыты ахтыһан” диэн сылаас-истиҥ сыһыаннаах биэчэр тэрилиннэ. Бириистээх оонньуулар оонньоннулар. Аҕам саастаах дьоннорбутугар анаан, ырыа бастыҥа ылланна, үҥкүү-битии оройуттан тутулунна. “Күбэйэ” эбээлэр түмсүүлэрэ былыргы үҥкүүлэри үҥкүүлээн ааспыт сыллары санатан аастылар.
