Ыам ыйын 27 күнүгэр алтыс төгүлүн ыытыллар «Кинигэ күүһэ» диэн Өрөспүүбүлүкэтээҕи акция Оҕо сылыгар уонна Россияҕа Дьиэ кэргэн сылларыгар ананна. Ол курдук, нэһилиэк бибилэтиэкэтигэр бу күн оҕо-аймах, ийэлэр, эбээлэр муһуннулар.
Демид Расулов Тимофей Сметанин «Күөрэгэй» диэн остуоруйатын кэпсээн билиһиннэрдэ, оҕолорго ааҕалларыгар сүбэлээтэ. Надя Сметанина Тимофей Сметанин «Куоска олоҥхотун» нойосуус ааҕан иһитиннэрдэ уонна «Курочка ряба» остуоруйаны кэпсээтэ. Иванов Степа, 2 кылаас үөрэнээччитэ, наһаа үчүгэйдик уобарастаан аахпыт кинигэтин, геройдарын тустарынан кэпсээтэ, оҕолор болҕомтолорун тарта. Аня Тимофеева, Самира Налыйдырова, Сайаан Ноговицын эмиэ сөбүлүүр остуоруйаларын кэпсээтилэр, ааҕыллыбыт айымньыларын тула санааларын үллэһиннилэр. Олохтоох ааптар, элбэх оҕо ийэтэ, эбээтэ Матрена Лазаревна хоһооннорун ааҕан иһитиннэрдэ, ааҕааччылар сэҥээриилэрин ылла. Анна Сивцева олохтоох ааптар Василиса Попова «Библиотекардарга» диэн анаан суруйбут хоһоонун ааҕан билиһиннэрдэ.
Акцияҕа кыттыыны ылбыт ааҕааччыларбытыгар барыларыгар сертификат туттардыбыт. Кыттыыны ылбыттарыгар махталбытын тиэрдэбит. Кинигэни ааҕыҥ, кинигэлиин доҕордоһуҥ, билиигитин хаҥатыҥ!
Мария Обутова, Сииттэ нэһилиэгэ.