Кэбээйи нэһилиэгэр Саха Өрөспүүбүлүкэтигэр «Оҕо саас сылыгар” анаммыт тэрээһиннэр тиһигин быспакка ыытылла тураллар. Бу күннэргэ “Кэскил” оҕо саада үгэскэ кубулуйбут “Чуопчаарар чооруостар” оскуола иннинэ саастаах оҕолор ыккардыларыгар ырыа, үҥкүү, муода тыйаатырын уонна оркестр куонкурсун тэрийэн ыытта. Быйылгы куонкурус уратытынан буолла, өрөспүүбүлүкэ таһымнааҕа уонна 20-с төгүлүн ыытыллыыта.
Куонкурус сыалынан-соругунан “Музыка для всех” барылга кыттан оҕону кыра сааһыттан кэрэ эйгэҕэ сыһыарыы, оҕо айымньытын, ыллыыр, үҥкүүлүүр дьоҕурун бэлиэтии көрөн күөдьүтэн биэрии. Уһулуччу оҕолору үөһээ кэрдиискэ таһааран иһии. Ырыа, үҥкүү, муода тыйаатырын нөҥүө дойдуга тапталы, бэриниилээх буолууну иитии, такайыы.
Куонкуруска сирэй кыттыы үс кэрдиис саас категориянан ырыа, муода тыйаатыра, үҥкүү, оркестр номинацияларынан ыытылынна. Сүбэ өрүү буоларыныы “Кэрэ эйгэ” оскуолатын, эбии үөрэхтээһин педагогтарын уонна култуура үлэһиттэрин истэриттэн талыллан үлэлээтэ. Ол курдук, СӨ баянист-аккордеонистарын, гармонистарын сойууһун чилиэнэ Винокурова Татьяна Ивановна, СӨ култууратын туйгуннара Харлампьева Александра Николаевна, Лугинова Валентина Николаевна, СӨ норуотун маастара Софронеева Елизавета Константиновна, «Кэскил” оҕо саадын сэбиэдиссэйэ Дьяконова Надежда Юрьевна.
Кыттар оҕолор ирдэбиллэргэ төһө эппиэттиирдик толорбуттарын көрөн сүбэ көрөөччүлэр санааларын кытта сөп түбэһэр бааллары туруораннар хас биирдии дипломаннар, лауреаттар, кылаан чыпчаал ааттар, номинациялар дохсун ытыс таһыныыннан доҕуһуолланнылар.
Чорбойор кыайыылаахтары сурукка тиһиллэрэ наадалааҕынан ааҕан бэлиэтиибин. “Звонкий голосок” анал ааты 4 саастаах “Кэскил” оҕо саадын иитиллээччитэ Эверстова Аэлита ылла. Салайааччыта Кобякова Ирина Гаврильевна. 6 саастаахтарга Куокуй нэһилиэгин “Ача” оҕо саадын иитиллээччитэ Хонотов Эрчим маннык анал аакка тигистэ. “Самый юный участник» анал ааты 1 сааһын 7 ый ааспыт “Сардаана» оҕо саадын иитиллээччитэ Кривошапкин Андрей — Харысхан ылла. Муода тыйаатырыгар “Лучший образ” ааты 4 саастаахтарга Левин Эрхан, “Кэскил” уһуйаан иитиллээччитигэр туттардылар. 6 саастаахтарга Тыайа нэһилиэгин “Кэнчээри” оҕо саадын иитиллээччитэ Килижеков Леон “Лучший образ” анал ааты ылла. Салайааччыта Лопатина Раиса Спиридоновна.
“Гран при” үрдүк ааттары сүктүлэр “Оркестр” номинацияҕа “Ача” оҕо саадын иитиллээччилэрэ “Оторой моторой уоланнар” бөлөх буолла. Ырыаҕа “Гран При” аатын ылла Левин Семен, “Сардаана” оҕо саадын иитиллээччитэ. Үҥкүү номинациятыгар “Гран При” буолла «Күнчээн” бөлөх, “Кэскил” оҕо саадын үҥкүү бөлөҕө. Муода тыйаатырдарын ыккардыларыгар “Гран При” бастыҥ ааты Тыайа нэһилиэгин “Кэнчээри” оҕо саадын “Айтыа” муода тыйаатыра.
Маны таһынан биирдиилээн оҕолорго анал бириистэр туттарылыннылар. Үҥкүү куттаах Харлампьевтар дьиэ кэргэн аатыттан “Кустук” уһуйаан үҥкүү ансамбылыгар Александра Николаевна анал бирииһин туттарда. Ырыа аргыстаах Татьяна Ивановна Винокурова уолунаан Дабайаанныын Тыайа нэһилиэгин “Кэнчээри” оҕо саадын “Дуораан” ырыа ансамбылыгар анал бириистэрин туттардылар. Иис-уус алыптаах эйгэтигэр эргийэ сылдьар Елизавета Константиновна Софронеева Тыайа нэһилиэгин “Кэнчээри” оҕо уһуйаанын “Айтыа” муода тыйаатырыгар бэйэтин анал бирииһин анаата.
Онтон маҥнайгы композитор Захар Константинович Степанов ыччаттара туруорбут сүрүн бирииһи “Гран Прин”-ны “Сардаана” оҕо саадын иитиллээччитэ Левин Сеня “Ийэм кэлиэн иннинэ” ырыаны толорон үрдүк ситиһиини ылыан ылла. Салайааччыта Айталина Моисеевна Сыроватская. Тыайа нэһилиэгин “Кэнчээри” оҕо саадын иитээччитэ Лопатина Раиса Спиридоновна үгүс элбэх ситиһиилэрдээх оҕолору бэлэмнээн “Лучший руководитель” анал ааты ылла.
Кэрэ эйгэни кэккэлэппит музыка дьоро киэһэтигэр ити күн 103 оскуола иннинэ саастаах кырачааннар кыттаннар, кыттыыны ылбыт кырачааннар түөстэрин барыларын күлүмүрдэс мэтээл киэргэтэн көтүөхтэрин кынаттара эрэ суох буоланнар кыайыы, үөрүү, дьол көтөллөнөн тарҕастылар. Мантан салгыы аны кэтэхтэн кыттааччылар үлэлэрин тутуу үлэтэ бара турар.
Бу иннинэ «Чуопчаарар чооруостар” куонкурус региональнай таһымнаах эбит буоллаҕына быйылгы куонкурус уратытынан буолар, өрөспүүбүлүкэ таһымыгар тахсыыта. Куонкурсу иилээн-саҕалаан тэрийээччилэринэн оҕо садын сэбиэдиссэйэ Дьяконова Надежда Юрьевна уонна музыкальнай иитээччи Кобякова Ирина Гаврильевна буолаллар.