Олунньу ыйга ыытыллыбыт “Олоҥхо эйгэтэ” семинар чэрчитинэн улуустааҕы быыстапкаҕа Кэбээйиттэн, Мукучуттан, Чагдаттан кэлбит иис үлэлэри көрөммүт дьүүллүүр сүбэ бастыҥ үлэлэри сылын аайы ыытыллар республиканскай “Якутия Мастеровая” быыстапка-дьаарбаҥкаҕа кытталларыгар талбыппыт.
Ол көрүү түмүгүнэн кулун тутар 3 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр тиийэммит улууспут нэһилиэктэриттэн айаннаан кэлбит маастардар бука бары, икки бутигынан уонна иннинээҕи балаһаакканы кытары ылан, үлэлэрбитин сааһыланан ыйаан, туруоран кэбистибит.
Чуолаан эттэххэ быраабыла быһыытынан бары улуустарга биирдии бутигы аныыллар, ону быыстапкаҕа эппиэттээх тэрийээччи Радомира Дмитриевнаны кытта кэпсэтэммин, ыраах улууспут түгэҕиттэн элбэх таһаҕастаах айаннаан кэлбит Сэбээн-Күөлбүт маастардарын үлэлэрин, бу иннинэ нэһилиэк үбүлүөйүнэн буолбут быыстапкаттан бастыҥнарын, биир туспа бутик ылан туруоралларыгар утары баран киэҥник турдулар. Ураты болҕомто уурулунна уонна үөрүүбүт үксээтэ.
Кулун тутар 4 күнүгэр “Якутия Мастеровая” быыстапка саҕаламмыта. Арыллыытыгар «Саха” НКИК «Саха сатаабатаҕа суох» биэрии кэлэн уһулбута. Кэбээйиттэн маастардар үлэлэрин сырдаппытым. Ону ютуб-каналларыттан «Саха сатаабатаҕа суох» биэриини булан көрүөххүтүн сөп.
Чагдаттан үс аас-маҥаас тэллэхтэри Мария Николаевна Эверстова уонна Астра Ивановна Винокурова тикпиттэрин дьон-сэргэ кэлэн тутан-хабан көрөн сэҥээрдилэр. Ону кытта бүтүннүү оҕуруо бүлтэгиир илиинэн тигиллибит таҥалай соннорун эргитэн-урбатан көрөн кэрэхсээтилэр. «Уран Иис” түмсүүнэн өрбүт сөрүөлэрэ турдулар. Быйыл Лена Николаевна Дмитриева, 84 саастаах ийэтинээн Мария Иннокентьевналыын өр сыл убаһа тириититтэн тараан мунньубут түүлэриттэн суҥ сөрүөнү өрөннөр, быыстапка кыл-сиэл үлэлэринэн көрүүгэ кыттаннар, биһирэнэн анал ааттаах номинацияҕа тиксэн бэлиэтэннилэр.
Иккис күн, кулун тутар 5 күнэ биллэрин курдук, Саха сирин норуот маастардарын анал идэлээх күммүтүгэр, үгэс быһыытынан Дьокуускайбыт киин уулуссатынан сахалыы таҥастаах сэлэлии хаамыы үрдүк таһымнаахтык ыытыллыбыта. Республикабыт 28 улуустарыттан барыта1700 киһи кытынна. Чуолаан биһиги улууспутуттан делегациябытыгар 40-ча киһи хаампыта. Манна даҕатан эттэххэ, делегацияны хаҥатаары Сиэгэн Күөлтэн үс сахалыы толору таҥастаах иистэнньэҥнэр айаннаан кэлэн кыттыстылар. Сэбээн Күөл эбээн таба тириитэ таҥастарынан Антуанетта Егоровна дьиэ кэргэнэ кыра оҕолорунаан кыттыбыта көрүөхтэн кэрэ көстүү этэ. Сангаартан култуура управлениетын исписэлиистэрэ Сардаана Степановна Левина, Светлана Ивановна Иванова уонна да атыттар кыттыыны ыллылар. Ол курдук, Кэбээйиттэн, Чагдаттан, Мукучуттан, Тыайаттан, Арыктаахтан уонна куоракка олорор Кэбээйилэр сахалыы мааны таҥастаах кэлэн киирэн көхтөөх кыттыыны ылбыттарыгар барҕа махталбытын тиэрдэбит.
Ол киэһэ 17:00 ч. «Уруйдан Уус күнэ!»- диэн өрөгөйдөөх бырааһынньыкпыт үөрүүлээх чааһа буолла. Манна СӨ «Норуот Маастара» үрдүк аатын бэлиэтин Култуура уонна духуобунас сайдыытын миниистирэ Афанасий Иванович Ноев Кэбээйиттэн Мария Николаевна Эверстоваҕа туттарда. Улууспут исписэлииһэ Сардана Степановна Левина сибэкки дьөрбөтүнэн эҕэрдэлээтэ.
Кулун тутар 6 күнүгэр сарсыарда «Саха” НКИК «Саха сатаабатаҕа суох» биэриигэ Сэбээн Күөл маастардарын таба, чубуку, таарбаҕан тириилэриттэн үлэлэрин СӨ норуот маастара Елена Фёдоровна Протопопова уонна Антуанетта Егоровна кэпсээбиттэрин киэҥ эйгэ көрүүтүгэр тахсыбыттарыттан ордук үөрдүбүт. Эбиэттэн киэһэ Мраморнай саалаҕа үс күннээх күөн-күрэстэр түмүктэринэн быыстапканы сабыы үөрүүлээх чааһыгар миэстэлэспиттэргэ наҕараадалары туттарыы буолла. Ол курдук, КМНС хотугу омуктар төрүт өбүгэлэрин бас таҥаһа Дэрбэкэ тигиитин күөн-күрэһигэр Сэбээн Күөлтэн эдэр иистэнньэҥ Алёна Климентьевна Протопопова кыттан иккис биһирэбиллээх миэстэҕэ тиксэн сыаналаах бирииһинэн наҕараадаланна. СӨ Уус Уран Оҥоһуктарын Маастарын аатын Саргылаана Доктороваҕа “Симэх” галерея дириэктэрэ Яна Викторовна Игнатьева үөрүүлээх быһыыга туттарда. Улуус аатыттан специалист Сардаана Степановна Левина сибэкки дьөрбөтүн туттаран түгэни хаартыскаҕа түһэрэн үйэтиттибит. Өссө биир үс күннээх Мас Уустарыгар анаан ыһыах тэрилин уһаныыга, кымыс кутар сири иһит көҥкөлөйүн уонна кымыс баһар удьаа хамыйахтары оҥорууга ыытыллыбыт күрэх түмүгүн биир бэйэм олус диэн сэҥээрдим. Ол курдук, бу күрэххэ кэккэ улуустартан барыта 10 уус кыттыбыт. Олор истэригэр оннооҕор дьахталлар уонна уолаттар уһанан биһирэммиттэрин олус сөхтүм. Биһиги улууспутуттан олохэр дьон уһаныыга бу маннык күрэстэргэ буолуохтааҕар көннөрү быыстапкаҕа даҕаны дьүрү кыттыбаттарын абарабын. Ама, олох сатабыла, дьоҕура суох буолбатахтар дии саныыбын. Көҕүлээн сылга хаста даҕаны биһирэбиллээх быыстапкалары хас нэһилиэк аайы тэрийэн ыытар атын улуустартан уустары ыҥыран семинардары, мааста- кылаастары тэрийэр киһи эр дьон уһаныыга көҕүлэниэх этилэр. Кэбээйибитигэр икки сылынан Олоҥхо Ыһыаҕа ыытылларынан онно бэлэмнэнии үлэтигэр былааннаан, торумнаан сөптөөх үлэни тэрийдэхпитинэ «Саха сатаабатаҕа суоҕун» биһиги да улууспутугар туоһулуур мас, тимир, туой, муос да уустара үүнэн тахсыахтарыгар саарбахтаабаппын.
«Олоҥхо Эйгэтэ» семинар чэрчитинэн ылыллыбыт резолюцияҕа семинардары, маастар-кылаастары тэрийэн ыытыы киирбитэ. Резолюция улуус үрдүнэн үлэлээтэҕинэ торумнаммыт кыаллыаҕа. Олохтоох дьон хас биирдии нэһилиэкпит аатын ааттатар туһугар күргүөмүнэн санаабытын ууран кыһалыннахпытына, норуот күүһэ — көмүөл күүһэ барыны бары кыайыахпыт. Олоҥхо Ыһыаҕын да ыһыахпыт. Быйылгы “Якутия Мастеровая” быыстапка-дьаарбаҥкатыттан сонуннаатым, түгэнинэн туһанан улууспут култуура управлениетын салалтатыгар делегациябыт кыттыыбытын тэрийсибит, салайсыбыт исписэлиистэригэр Сардаана Степановна Левинаҕа, Светлана Ивановна Ивановаҕа үтүө сыһыаҥҥытыгар барҕа махталбытын биллэрэбит.
СӨ Норуот Маастара Елизавета Софронеева — Ил Ииһэ Санаайа.
