Кэбээйигэ эдэр ыччат түмсүүтэ (бэрэсэдээтэл Т.П. Лепчикова) спартакиада тэрийэн түөлбэлэр ыккардыларыгар спорт араас көрүҥэр күрэхтэһии бара турар. Бу күннэргэ нэһилиэк дьаһалтатын баһылыга Илья Левинныын уонна Улуустааҕы бильярд спордын бэрэсэдээтэлин Иннокентий Ивановтыын сөбүлэҥ түһэрсэннэр ыччат түмсүүтэ түөлбэ олохтоохторун ыккардыларыгар бильярд күрэҕин тэрийэн ыытта.
Чөл олоҕу көҕүлээһин, ону сэргэ спорт биир көрүҥэр, бильярд оонньуутугар, дьону тардар сыаллаах-соруктаах бу тэрээһин буолла. Күрэхтэһиигэ түөлбэ аайыттан сааһыттан тутулуга суох 3 эр киһи уонна 1 дьахтар кыттара ирдэниллэн түөлбэ олохтоохторун иһигэр балачча хамсааһын таҕыста. Түөлбэлэр салайааччылара кыттааччыларын сыымайдаан бэрт өр кэмҥэ бэлэмнэнии түмүгэр 6 түөлбэ биирдии хамаанданы туруораннар күрэхтэһии үс остуолунан ыытылынна.
Икки күннээх күөн көрсүү түмүгэр судьуйалар ааҕан-суоттаан миэстэлэри анаатылар, кыайыылаах түөлбэлэри ааттаталаатылар. Түмүк маннык буолан таҕыста, 1 миэстэни «Тайылаахы» (салайааччы М.Е. Гуляева), 2 миэстэни «Сайдам» (салайааччы А.М. Терехова), 3 бочуоттаах миэстэни «Сарыал» (салайааччы И.В. Терехова) түөлбэлэр ыллылар.
Тэрийээччилэр кыайыыны ситиспит хас биирдии кыттааччыга мэтээллэри кэтэрдэн, дипломнары туттаран ситиһиилэрин чиҥэттэ. Бу күрэххэ барыта 6 түөлбэттэн 24 кыттааччы оонньоон бильярд курдук чуолкай, өй сымсатын сайыннарар спорт биир көрүҥэр балачча умньаннылар, ыалластылар, ньымаларга үөрэннилэр, албастары биллилэр.
Санатан эттэххэ бу спартакиаданы үс сыллааҕыта көҕүлээччинэн буолбута Аграфена Афанасьева, эдэр ыччат түмсүүтүн активын чилиэнэ. Аграфена Степановна спартакиаданы ымпыгар-чымпыгар тиийэ бэлэмнээн салайан ыытан кэллэ.
Татьяна Максимова-Лазарева