Ил Дархаммыт Саха өрөспүүбүлүкэтигэр 2024 сылы Оҕо саас сылынан биллэрбитэ. Үүнэр көлүөнэ ыччакка бу сылга хаһааҥҥытааҕар да ураты болҕомто кинилэр доруобуйаларыгар уонна уйулҕалара харысхаллаах, уйуктаах буолуутугар ууруллуоҕа.
Бу үтүө дьаһал чэрчитинэн Кэбээйи нэһилиэгэр Оҕо саас сылын арыйыы культурнай сырдатар кииҥҥэ (директор Л.С. Семенова) тэриллэн ыытылынна. Киин сырдык киэҥ дьиэтэ бу күн дьоллоох оҕо саас чаҕаар куолаһынан туолла. Нэһилиэккэ тигинэччи үлэлии турар үс оҕо саадын иитиллээччилэрин түмэ тардан киин үлэһиттэрэ ураты дьоро күнү бэлэхтээтилэр. Директор Любовь Семенова уонна мультик араас дьоруойдара кырачааннары тула көтө сылдьан эстафетаҕа оонньотон, кырачааннары үҥкүүлэтэн, ыллатан дьоллоох оҕо саас биир күнүн уратытык симээтилэр.
Татьяна Максимова-Лазарева