Атырдьахтанан, кыраабылланан аарыма оту таһаарар кэммитигэр, Кэбээйибит үтүө-мааны ыалларын — Афанасий Афанасьевич уонна Екатерина Ивановна Захаровтар кыра уоллара, Дмитрий байыаннай эпэрээссийэттэн сынньалаҥар кэллэ. Нэһилиэхпит устуоруйатын сэһэргиир ытык сиргэ — «Томтор» скверигэр үөрүүлээх-долгутуулаах көрсүһүү буолла. Өбүгэ үгэһин сөргүтээччи Е.К. Софронеева аал уот нөҥүө эдэркээн буойуну өбүгэлэр сырдык сылаас тыыннарынан арчылаата, араҥаччылаата. Нэһилиэкпит Аҕа баһылыга А.Н. Кобяков Дмитрийы этэҥҥэ кэлбитинэн эҕэрдэлээн туран, улуус уонна нэһилиэк былаахтарын, көмө харчыны туттарда, алгыһын анаата.
Бас-көс дьоннорбут Е.А. Павлов, Н.П. Софронеев, С.С. Кобяков, Г.К. Егоров уонна учуутала А.П. Терехова саалаахтан самныбакка, охтоохтон охтубакка иэримэ дьиэтигэр, ахтылҕаннаах алааһыгар, биир дойдулаахтарын кытта Кыайыы кынаттанан эргиллэн кэлэригэр алгыстарын анаатылар, сэмэй бэлэхтэрин туттардылар.
Киһиэхэ күүһү-уоҕу, олоххо дьулууру төрөөбүт дойдута эрэ иҥэрэр. Онон, саха ньургун уолугар Дмитрийга төлкөлөөх төрүт дойдута туругун тупсардын, Кыайыыга-хотууга суолдьут сулус буоллун! Бар дьонун алгыһа харыстаатын, эрэли үөскэттин!
Венера Лугинова.