Кэбээйи нэһилиэгин общественнай түмсүүлэрэ: серебрянай волонтердар «Үтүө түгэн» (сал. Максимова Т.Д.), дьахталлар «Сандаара» (сал. К. А. Терехова), эбээлэр «Күбэйэ» уонна иистэнньэҥнэр «Оһуор тойуга» (сал. Е. К. Софронеева) былырыыҥҥаттан «Якутия с тобой!» уопсастыбаннай хамсааһын акциятыгар ис дууһаларыттан көхтөөхтүк кытталлар.
Ол курдук, маскировочнай сеткалары, блиндажнай чүмэчилэри, бубликтары, валиктары, стелькалары, аптечкалары уонна балаклавалары тигэн, собо ыһаарылаан, харчынан көмөлөстүлэр.
Ааспыт балаҕан ыйыгар нэһилиэк депутаттарын Сэбиэтин бэрэсэдээтэлэ Кландра Андреевна Терехова бары түмсүүлэртэн иискэ дьоҕурдаахтары, баҕалаахтары түмэн « Надежный тыл» иис сыаҕын тэрийбитэ. Бу сыах Саха сирин ийэлэрин «Илии сылааһа» иистэнэр сыаҕын филиала буолар. Кинилэр дьиэлэриттэн иистэнэр массыыналарын аҕалан байыаннай дьайыыларга сылдьар уолаттарбытыгар анаан ичигэс таҥаһы тигэллэр. Кинилэр маастар кылааска үөрэммэтэллэр да, балаҕан ыйын 15 күнүгэр буолбут икккис республиканскай иис күрэҕэр 10 көрүҥ таҥастаах 7 « Эр хоһуун» комплегын үрдүк таһымнаахтык тигэн ыыттылар, сертификаттары , хайҕал суругун, продуктанан бириэмийэлэннилэр. Улуус баһылыга Иван Иванович Левин хас биирдиилэригэр махтал суруктары, сэмэй бэлэхтэрин ыытта. Депутаттар Сэбиэттэрин ылыныыларынан көмөҕө оверлок иистэнэр массыына ылылынна.
Куоракка олорор биир дойдулаахпыт, медик идэлээх Антонина Николаевна Сметанина бу сыл саҕаланыаҕыттан үлэтин кэнниттэн «Илии сылааһа» сыахха бэйэтин баҕатынан иистэнэ сылдьар. Бу буолан ааспыт иис күрэҕэр Кэбээйилэргэ кураторынан анаммыт буолан, сүбэлээн — амалаан көмөлөстө. Бу күннэргэ дойдутугар кэлэн иис сыаҕар хайдах үлэлии олороллорун көрдө — иһиттэ. Кини харах балыыһатын кылаабынай бырааһа Иван Петрович Луцкан спонсордаан электрическай таҥас быһар кыптыый ыыппытын иистэнньэҥнэргэ туттарда, бары олус үөрдүлэр, барҕа махталларын ыыталлар. Куратор Антонина Николаевна бу курдук сэһэргээтэ:
— Ирина Егоровна Саввина салайааччылаах «Илии сылааһа» иис сыаҕа технопарк «Якутия», Дзержинского уул. 76, блок С аадырыска баар. Тутаах көмөлөһөөччүлэринэн Р.В. Тарабукина, А.Г. Рожина, Т.А. Кривошапкина быстах байыаннай дьайыыларга барар уолаттарга иистэнэн, толору таҥастаах «Эр хоһуун» мөһөөччүгү туттараллар. Бу сайын Таатта улууһун Дьохсоҕон нэһилиэгэр бастакы үлэ — иис күрэҕин ыыппыппыт, Мэҥэ Хаҥалас хамаандата кыайбыта. «Илии сылааһа» иис сыаҕар Кэбээйи улууһун Сиэгэн Күөлүттэн А.И. Тебенькова, А.И. Алексеева, Сииттэттэн М.С. Захарова, Мукучуттан Иванова Н.В салайааччылаах сыахтар кэлэн үөрэннилэр, иистэннилэр, кинилэргэ олус махтанабыт. Ииспит быыһыгар «Сухой душ» оҥорон бэлэмнээн ыытабыт. Тикпит таҥастарбытын сонно тута ылан бараллар, сакаастар эбии киирэ тураллар, онон эбии иистэнньэҥнэр наадалар. Сэтинньи ый саҕаланыыта маастар кылаас ыыта кэлиэхтээхтэр, онно чугас нэһилиэктэр иискэ үөрэнэ кэлиэ этилэр. Сыаххытыгар эбии иистэнэр массыыналары ылынаргытыгар спонсордаан көмөлөһөллөрө буоллар. Олохтоох таксист уолаттаргыт босхо таһалларыгар махтанабыт, өссө да көмөлөһө турдуннар.
Алтынньы ый 17 күнүгэр, Кэбээйитээҕи « Сайдам» норуот айымньытын киинигэр своттан уоппускаҕа кэлэ сылдьар бэйэбит уолаттарбыт Платон Ф. уонна Александр Л. кытта көрсүһүүгэ Антонина Николаевна тыл этэн туран, байыастарга «Надежный тыл» иис сыаҕа тикпит «Эр хоһуун» таҥастарын туттартаата, алҕаата.
Венера Лугинова