Кэскиллээх Кэбээйибит дьоллоох туонатыгар, Кэбээйи улууһун «Кэбээйи нэһилиэгэ” муниципальнай тэриллии аҕа баһылыгын дуоһунаһыгар киириитин сиэрэ-туома ыытылынна. Сахалыы сиэринэн арыылаах алаадьынан, уохтаах кымыһынан айах тутан аал уоту оттон, сиэри-туому Нам Түбэтиттэн төрүттээх алгысчыт – А.Л. Егоров – Өркөн — Дьол ситэри толорон тэрээһини аста.
Ааспыт быыбар түмүгүн иһитиннэрэн туран, муниципальнай тэриллии быыбардыыр хаамыыһыйатын аатыттан – Кобякова И.Г., Семенова Н.С. туоһу дастабырыанньаны аҕа баһылыкка туттардылар. Аҕа баһылык Илья Левин андаҕар тылын нэһилиэгин олохтоохторугар эттэ. Үөрүүлээх тэрээһиҥҥэ — СӨ правительствотын председателин солбуйааччыта Анатолий Семенов, РФ Ил Тумэн Гос. мунньаҕын депутатынан өр сылларга үлэлээбит, төрөөбүт – үөскээбит Кэбээйитин улууһугар үгүс элбэх өрүттээх үлэни ыыппыт, биһиги биир дойдулаахпыт Михал Эверстов, ООО “Прогресс” директора Алексей Пинигин, Кэбээйи нэһилиэгин депутаттарын сэбиэтин председателэ Кландра Терехова, өр сылларга салайар үлэҕэ үлэлээбит, нэһилиэк депутата Н.П. Софронеев эҕэрдэ истиҥ тылларын тиэртилэр.
Тэрээһин чэрчитинэн, ааспыт 2023 сыл — Россияҕа Педагог уонна наставник, Саха сиригэр Үлэ, улууспутугар Экология сылларын түмүктээн, учууталларга, үлэһит үтүөтэ дьоннорго — үүнэр көлүөнэ ыччаттарбыт махтал тылларын хоһоонунан тиэртилэр. Быйыл үүммүт 2024 сылбыт – Дьиэ кэргэн сыаннастарын харыстыырга, кинилэри киэҥник тарҕатыыга сыаллаах-соруктаах Россия үрдүнэн — Дьиэ кэргэн, төлкөбүтүн көрдөрөр , кэскилбитин кэпсиир Сахабыт сиригэр — Оҕо саас сыла саҕаламмытынан, тапталлаах улууспутугар Норуоттар култуураларын нэһилиэстибэтин сылын бэлиэтиир, театрализованнай концерынан уруйдаан-айхаллаан туран, киэҥ ис — хоһоонноох тэрээһин уопсай хаартыскаҕа түһүүнэн үөрүүлээх быһыыга-майгыга түмүктэннэ.
Кэбээйитээҕи “Сайдам ” норуот айымньытын киинин уус-уран салайааччыта Ефросинья Кириллина
Хаартыскаҕа түһэрии – Кобякова М.В.