Дьокуускайга байыаннай таҥас тигиитигэр IV Өрөспүбүлүкээнискэй «Үлэ-иис күрэҕэ» куонкуруска араас улуустар баҕа өттүнэн хамаанда туруоран, Уус-Алдантан, Намтан, Мэҥэ-Хаҥаластан, Тааттаттан, Чурапчыттан, Дьокуускайтан кэлбиттэр. Ыраах Халыма, Булуҥ улуустартан хамаандалар кэлэннэр, тэрийээччилэри үөрпүттэр.
«Кыайыы 50 сыла» успуорт дыбарыаһыгар хамаандалар үс күн устата сарсыардаттан киэһэ 10 чааска диэри уочунай күрэххэ дьүүллүүр сүбэ хараҕын далыгар олорон үлэлээтилэр. Балаһыанньанан хас биирдии хамаанда «Эр хоһуун» мөһөөччүк 7 кэмпилиэгин тигэллэрэ ирдэнэр. Биирдии кэмпилиэккэ 15 наименование, 18 пиридимиэт киирэр: флис көстүүм, тактическай көстүүм, х/б ыстааннаах куртка, ардахха кэтиллэр туспа ыстааннаах куртка, поло, футболка, автомакка дуло уонна да атыттар. Кыттааччыларга тыҥааһыннаах күннэр, эппиэтинэстээх үлэлэр, сымсатык туттуу-хаптыы, имигэстик иистэнии, хаачыстыбалаахтык тигии…
Төрдүс күнүгэр тэрийээччилэр хамаандаларга түөрт араас музейдарга култуурунай тэрээһини, остуол оонньуутугар күрэхтэһиини ыыппыттар. Кыттааччылар Хомус, Муусука уонна Фольклор музейдарын сэҥээрэн көрбүттэр. Кэбээйи улууһун хамаандатыттан С. Докторова, К. Терехова, Т. Абрамова, Т. Еремеева, Р. Игнатьева остуол оонньууларыгар киирэн киирсэн, үс көрүҥҥэ 1 миэстэни ылбыттар, икки көрүҥҥэ бириистээх 3, 4 миэстэҕэ тиксибиттэр.
От ыйын 11 күнүгэр киэһэ күрэх долгутуулаах түмүк чааһа буолбут. СӨ бырабыыталыстыбатын араас Министиэристибэлэриттэн бэрэстэбиитэллэр кэлэннэр, кыттааччылары эҕэрдэлээн туран, үөрүүлээх быһыыга-майгыга сыаналаах бириистэри, үрдүк наҕараадалары туттардылар.
IV Өрөспүүбүлүкэнискэй «Үлэ-иис күрэҕэ» куонкуруска Муҥур кыайыылааҕынан Кэбээйи улууһун хамаандата таҕыста (сал.Терехова К.А.). Хамаандаҕа СӨ энергетика уонна олох-дьаһах Министиэристибэтэ туруорбут бирииһин (промышленнай иистэнэр массыынаны уонна оверлогу) СӨ Гражданскай оборуона дьыалаларыгар уонна нэһилиэнньэ олоҕор-дьаһагар куттал суох буолуутун хааччыйыы миниистирэ Д. Лепчиков туттарда. “Самый экономичный закройщик” номинацияҕа 2 миэстэ Афанасьева И.А. ааттанна, “Аврора” фирма иис наборун ылла. «Илии сылааһа» салайааччыта И.Е. Саввина сыаналаах бэлэҕин “Надёжный тыл” маастарыгар Левина Е.Ф. анаата.
«СӨ баҕа өттүнэн үлэлиир Ресурснай киин» (дир. А.В. Винокуров) «За оказание помощи участникам СВО» улууспутугар бастакынан тэриллибит, проект суруйан көмүскээн Муҥур кыайыылаах аатын ылан, утумнаахтык үлэлии олорор Мукучу нэһилиэгин иистэнньэҥҥэрин И.А. Афанасьева, Н.В. Иванова, П.Е. Афанасьева түөскэ кэтэр бэлиэнэн наҕараадалаата.
СӨ Бырабыыталыстыбатын бэрэссэдээтэлин бастакы солбуйааччыта Д.Д. Садовников уонна «Доруобуйа харыстабылын Министерствотын иһинэн Ресурснай киин» аатыттан Е.М. Терентьев хас биирдии куонкуруссааннарга Махтал сурук, бэлэх, тыыннаах сибэкки туттардылар. Итини таһынан Д. Садовников Кэбээйи нэһилиэгин волонтёругар, суоппарыгар М.М. Данилов Махтал суругун биэрдэ.
Улууспут администрациятыттан И.Н. Алексеев кыттыбыттарга махтанан тыл эттэ, махтал сурук, бэлэх туттарда уонна улуус Куокуй “Надежда” түмсүүгэ (сал. Т.У. Еремеева) иистэнэр массыына анаабытын иһитиннэрдэ.
Чахчы да патриотическай өйдөөх-санаалаах ийэ, эбэ буоланнар, ыччаттар тустарыгар хамаанда тэринэн тиийэн, илиилэрин сылааһын иҥэрэн, байыаннай таҥас тигэн, дьүүллүүр сүбэ үрдүк сыанабылын ыллахтара. IV Өрөспүүбүлүкэнискэй «Үлэ-иис күрэҕэ» кыайыылаах буолбуттарынан эҕэрдэлиибит! Сахалыы сэмэйдик махтанабыт.
Ираида Софронеева, Куокуй