Саха өрөспүүбүлүкэтигэр Оҕо саас сылыгар ананар.
Көтөх Бэрэҕэ тыа хаһаайыстыбатын «Сайылык» кээпэрэтиибэ (салайааччы Дьяконов П. А.) сайыҥҥы лааҕырыгар 1 сезоҥҥа «Эрчим» 5 оҕолоох үлэ лааҕырыгар биир ый баһаатайынан үлэлээтим. Үлэҕэ сыстаҕас уолаттар буоланнар, 1 сезон этэҥҥэ түмүктэннэ. Ол курдук Гаврильев Айтал, Гаврильев Айтал, Алексеев Ким, Бандеров Стас (Орто Халыма), Азаров Радомир диэн оҕолор үлэлээтилэр. Уолаттар аан маҥнайгыттан үчүгэй бэрээдэктэрин, үлэҺиттэрин көрдөрдүлэр. Күн аайы үлэ көрүҥэ уларыйан иһэр, ол курдук ким ньирэйдьиккэ, ким ыанньыксыкка көмөлөстө. Ону таһынан лааҕырбыт хоһугар, ис-тас үлэтигэр дьуҺуурустуба олохтообуппут. Быыһыгар бостууктарга көмөлөстүлэр. Итини таһынан эбии үлэ диэн сайылыкпыт таһын ыраастааһын, титиик таһын хомуйуу, опилка, бөтүөннээх үүттэри таһыы, ньирэй хааччаҕын оҥоруу үлэтигэр сырыттылар. Оҕолор ынаҕы дойканан, илиинэн ыырга үөрэннилэр.
Иллэҥ кэмнэригэр сынньалаҥҥа сөтүөлээн, футболлаан, волейболлаан, бириэмэлэрин бэртээхэйдик атаардылар. Cороҕор ырыа да үөрэтэн, ыллаан да ылабыт.
Көтөх Бэрэҕэ үлэлиирбит тухары элбэх тэрээһиннэри, күрэхтэһиилэри ыыттыбыт. Лааҕырбыт аһыллыытыгар уонна сабыллыытыгар элбэх оонньуу оонньонно, ас арааҺын аҺаан, ыллаан, күрэхтэһэн, умнуллубат түгэннэр бэркэ аастылар.
Ону таһынан ыһыахха уолаттар эмиэ үрдүк ситиһиилэри көрдөрөн, үөрүүбүт өссө үрдээбитэ. Ол курдук Гаврильев Алик бастыҥ сүүрүк, Азаров Радомир бастыҥ сыал ытааччы, Бандеров Стас атах оонньуутугар бастыҥ аатын ылбыттара.
Кэпэрэтиипкэ олус көхтөөх дьон үлэлииллэр эбит.
Манна үлэлииргэ, сынньанарга бэртээхэй усулуобуйа барыта тэриллибит: таҥас сууйар массыына, итии, тымныы уулаах суунар кабина, сенсорнай билиитэ, хас хос аайы холодильник, куукуна тэрилэ бааллар.
Лааҕырбытыгар күн аайы сибиэһэй эт, сүөгэй, килиэп, бородуукта ылан, оҕолор минньигэстик сөбүлүүр астарын аһаан астыннылар, үөрдүлэр. Сайылыкпытыгар өйдөбүнньүк курдук хаартыскаларынан истиэнэ хаһыатын оҥорон бэлэхтээтибит.
Мин оҕо эрдэхпиттэн үлэлээбит, сынньаммыт сайылыкпар быйыл сылдьаммын, үлэлээммин, Валентина Кондакова тылларыгар үс ырыаны айдым: «Көтөх Бэрэ сайылыкпыт», «Сайын», «Кэрэ ырыа».
Онон түмүкпэр кэпэрэтиип кэлэктиибигэр улахан махталбытын тиэрдэбит уонна инникитин бу лааҕырга кэлэн үлэлээҥ, сынньаныҥ диэн оҕолорго сүбэлиибин. Көтөх Бэрэҕэ умнуллубат кэрэ-бэлиэ күннэр аастылар. Бириэмэбитин олус туһалаахтык атаардыбыт. Оҕолорбор үлэҕэ-үөрэххэ ситиһиилэри баҕарабын, күһүн улаатан, күүс-уох эбинэн, үөрэххэ бэлэм кэлээриҥ диэн баҕа санаабын тиэрдэбин.
БаҺаатай Макарова Айталина Григорьевна.