Үтүө санаа, үтүө доҕор сыһыана кыһалҕа кэмигэр биллэр. Биһиги нэһилиэккэ аһымал тэрээһиннэр түгэнигэр көхтөөхтүк ыытыллаллар. Бу кэмҥэ оҕобут Эрсан Гуляевка көмө буолар аналлаах «Эр санаанан кынаттанан» диэн аһымал акция-кэнсиэрэ Кэбээйигэ уонна Тыайаҕа буолан ааста.
Манна СР култууратын туйгуна, СР Ыччат политикатын туйгуна, элбэх хит ырыа автора, ырыаһыт, Өрөспүүбүлүкэбит тэрээһиннэрин биир бастыҥ ыытааччыта, оскуолабыт киэн туттар үөрэнэн бүтэрээччитэ Петр Гуляев биир дойдулаахтарыгар сайаҕас санаалааҕын, үгүс үтүө доҕоттордооҕун өссө биирдэ көрдөрдө, хайҕатта. Петр Егорович Чурапчы улууһун культураҕа салаатыгар биллэр-көстөр үлэһит, дьоһун-мааны ыал буола сылдьара барыбытын үөрдэр. Бу сырыыга доҕотторунаан, Саха эстрадатын чаҕылхай сулуһа, артыыс, алгысчыт, элбэх хит ырыа автора, Саха Республикатын култууратын туйгуна, Виталий Очиров; киинэ, театр артыыһа, СР култууратын туйгуна Алексей Ходулов; СР култууратын туйгуна, «Smile» бөлөх солиhа Гаврил Лыткин буолан көрдөөх монологтаах, кэһии туттарыылаах оонньуулардаах, ылбаҕай ырыалардаах дьоро киэһэлэри Кэбээйибит нэһилиэгэр уонна Тыайатыгар бэлэх уунан бардылар. Уолаттар истиҥ-иһирэх, алгыстаах тылларын, уйулҕаны таарыйар кэрэ куоластарын истэн сүргэбит көтөҕүлүннэ, оҕобут үтүөрэригэр баҕа санаабыт, эрэлбит өссө күүһүрдэ.
Амарах санаа аргыстаах, ураты куоластаах, көрөөччүнү сэргэхситэр булугас толкуйдаах уолаттарбытыгар, Кэбээйи нэһилиэгин дьонугар-сэргэтигэр көмө оҥорбуккутугар ис сүрэхтэн тахсар махталбытын биллэрэбит уонна өрүү даҕаны амарах санаа, үтүө сыһыан, сомоҕолоһуу күүһэ сайдыыга, кыайыыга, чөл турукка, этэҥҥэ буолууга тиэрдэ турарыгар баҕарабыт.
Екатерина Архипова.
Ааптар хаартыскаҕа түһэриитэ.