Аграрнай уонна арктическай улуустар ыккардыларыгар бильярдка хамаанданан бастыырга күрэхтэһии Дьокуускай куоракка буолан ааста.
Биһиги улуустан Евгений Прокопьевич Габышев хапытааннаах бильярдистар хамаандалара бу күрэххэ кыттан кэллэ. Хамаанда улуус араас нэһилиэктэриттэн таҥыллан биир киһи курдук миэстэлэһэр туһугар бэркэ кииристилэр. Хамаандаҕа Мастаах нэһилиэгиттэн 11 кылаас үөрэнээччитэ Софронов Витя, Сангартан улуус администрациятын үлэһитэ Альбина Спиридонова, Кэбээйиттэн Виктор Иванов, ОДьКХ үлэһитэ Василий Терехов, КГДЭС үлэһитэ Афанасий Докторов уонна капитан Евгений Габышев.
«Хамаанда сорох чилиэннэрэ маннык таһымнаах күрэхтэргэ кыттыыны ылан кэлбиппит. Онтон Виктор Иванов аан бастакы кыттыыта буолан олус долгутуулаах этэ. Виктор “Открытие турнира”, — диэн анал номинацияҕа тигистэ. Василий Терехов уонна Альбина Спиридонова маннык күрэххэ эмиэ бастакы сүрэхтэниилэрэ» диэн кэпсиир хамаанда капитана.
Евгений Прокопьевич этэринэн бильярд диэн киһиттэн элбэҕи эрэйэр саҥа сайдан эрэр спорт көрүҥэ. Бильярдка дьарыктаныан баҕалаахтары барыларын ыҥырарын биллэрдэ: «Бильярды сөбүлээҥ, бильярдынан дьарыктаныҥ!!! Улууска, республикаҕа элбэх үрдүк таһымнаах күрэх бөҕөтө буолар. Барыгытыгар доруобуйаны, үлэҕитигэр — үөрэххитигэр ситиһиини!!!”.
Кэбээйи улууһун хамаандата бу күрэххэ 14 хамаанда кыттыбытыттан 3-с миэстэҕэ тиксэн кэллэ. Бу үчүгэй көрдөрүү. Элбэх үлэттэн, дьаныартан тахсар кыайыы буолар.
Манна даҕатан бэлиэтиир буоллахха, Кэбээйи улууһугар бильярд федерациятын президенэ Иннокентий Иннокентьевич Иванов спорт бу көрүҥэ улууска сайдарыгар күүскэ үлэлэһэр. Бильярд тула дьону-сэргэни түмэ тардар, дьарыктанар уонна күрэхтэһэр усулуобуйаны тэрийэр.
Татьяна Максимова-Лазарева