Хайа баҕарар нэһилиэккэ араас дьоҕурдаах эдэр ыччат баар буолар. Ол курдук Тыайа нэһилиэгэр от ыйын 10 күнүгэр биир дойдулаахпыт Аргунова Антонина Григорьевна бэрт сэргэх маастар-кылааһа буолан ааста.
Оҕобут Антонина Григорьевна гипсэнэн бэйэтин оҥоһуктарын көрдөрдө. Хайдах оҥорорун быһааран баран, силиконтан араас моһуоннаах оҥоһуктары үөрэттэ, маастар-кылаас ыытта.
Антонина улахан, иллээх, үлэни өрө туппут дьиэ кэргэҥҥэ төрөөбүтэ. Кыратыттан киэҥ билиилээх, үгүс сатабыллаах буола улааппыта. Орто оскуола кэнниттэн педагогическай институту бүтэрэн, Горнай улууһун Кэптин нэһилиэгэр уһуйаан иитээччитинэн ситиһиилээхтик үлэлии сылдьар. Сайын аайы дойдутугар кэлэн дьонугар көмө-тирэх буолар. Сүөһү көрүүтэ, оттооһун, сир аһын хомуйуу, дьиэ өрөмүөнэ кини сатабылын иһинэн ааһар.
Бу маастар-кылааска элбэх киһи кэлэммит көхтөөх кыттыыны ыламмыт, олус диэн сэргээн, үөрэнэн, үөрэн-көтөн дьиэбитигэр тарҕастыбыт.
Инникитин даҕаны, Антонинабытыгар саҥаттан-саҥа сатабылларын, оҥоһуктарын биир дойдулаахтарыгар аҕалан билиһиннэрэ, үөрэтэ, сэргэхситэ туруо диэн бигэ эрэнэбит. Ким өссө үөрэниэн баҕалаахтары маннык маастар-кылаастарга сылдьан иннигит диэки дьүккүйэн иһиҥ диэн сүбэлиибин. Билиигитин хаҥатыныҥ, маннык маастар-кылаастарга сылдьыҥ диэн ыҥырабын.
Мария Яковлевна Гаврильева. Тыайа.