Унньуктаах уһун кыһын кэнниттэн сааспыт барахсан чаҕылхай күнүнэн сырдатан, көмүс сардаҥаларынан угуттаан күүтүүлээх уһуктуу кэмин бука бары долгуйа күүтэбит.
Ол курдук, Мукучубут нэһилиэгэр Күөх Маайы көрсө Эйэ, Үлэ бырааһынньыгынан тэрилтэлэр икки ардыларыгар бэрт сэргэх Фестиваль буолан ааста.
Уопсайа түөрт тэрилтэ туруу үлэһит дьоно үс көрүҥҥэ үрдүк таһымнаахтык кыттан илин-кэлин түһүстүлэр. Дьүүллүүр сүбэ ырыаны, үҥкүүнү, киинэттэн быһа тардыыны сөптөөхтүк сыаналаан маннык түмүк таҕыста:
П.Н. Яковлев аатынан Мукучутааҕы врачевнай амбулатория үрүҥ халааттаах аанньаллара «Лучшие оригинальные номера» анал ааты ылан өрөгөй үөрүүнү биллилэр. Хас биирдии нэһилиэкпит тэрилтэлэригэр бу курдук ураты көрүүлээх, сылаас тыыннаах, сатабыллаах тэрилтэ элбии турдун. Билиигэ, сырдыкка, үрдүккэ сирдиир И.Е. Левин аатынан Танара орто оскуолата «Лучший коллективный танец» анал ааты ылан барыбытын сөхтөрдүлэр. Кинилэр тэрилтэлэргэ инникитин көлүөнэ ситимэ быстыбатын туоһулуур, бастыҥ сирдьит буолаллар диэн сыаналыыбыт. «Мукучу нэһилиэгэ» МТ «Лучшая постановка» анал ааты ылан чахчы да нэһилиэккэ сайдыыны, сонун сүүрээни, бар дьону салайыыга сатабыллаах, эппиэтинэстээх, үтүө холобур буолалларын көрдөрдүлэр. Маны таһынан, «Белое солнце пустыни» киинэттэн быһа тардыыга бастыҥ оруолун иһин Николай Иванович Левин грамотанан наҕараадаланна.
Ийэлии истиҥ сыһыаны, аҕалыы амарах сүрэҕи биһиктээн илдьэ сылдьар истиҥ иитээччилэрбит «Кэнчээри» уһуйаан үлэһиттэрэ үс көрүҥ тухары бастыҥ көрдөрүүнү ылан муҥутуур кыайыылаах аатын сүктүлэр. Ону тэҥэ Анна Петрова «Морозко» остуоруйаҕа оҕонньор оруолун бастыҥ толоруутун иһин грамотанан наҕараадаланна. Чахчы да кырачааннарбытын кэрэҕэ, сырдыкка сирдиир үтүө сүрэхтээх иитээччилэрбит бэртээхэй ситиһиилэриттэн бары да үөрдүбүт.
Бу курдук үлэһит норуоту түмэр күн чахчы барыбытын сомоҕолоото, үөрүү кынаттаан үрдүккэ көтүттэ, саҥа сонун сүүрээни, сарсыҥҥы күҥҥэ эрэли сахта!
Вера Прокопьева