Саҥа сылы уруйдуу

Сииттэҕэ»Саҥа сылы уруйдуохха!» диэн оҕолорго утренник буолан ааста. Барыта кыралыын — улаханныын 50 тахса киһи кыттыыны ыллылар.

Оҕолорбутугар анаан күрэх, оонньуу арааһа ыытылынна. Кинилэр олус сэргэхтик, бары ыытыллар тэрээһиҥҥэ көхтөөхтүк кытыннылар. Күлүгүнэн остуоруйа кытта туруордулар. Оҕо барахсаҥҥа кыра да наада, кинилэр баҕа санааларын толорорго киһи үөрэ — көтө, тугу баҕарар тэрийиэн сөп дии саныыбын. Олус сырдык, ыраас санаалаахтар, кыраттан үөрүнньэҥнэр, онон оҕолорбутун түмэ тардарга хаһан баҕар чэпчэки буолар. Ити курдук саҥа сылы уруйдаан, үөрэ — көтө көрүстүбүт, астынныбыт диэн кэлбит дьон махтанан тарҕастылар.

Эдэр ыччаттарга анаан » Цветная вечеринка» бырааһынньыга буолан ааста. Манна үс дьиэ кэргэн көхтөөх кыттыыны ыллылар. Күрэхпит көхтөөх кыттааччыларынан буоллулар Ольга, Егор Левиннар, Светлана, Афанасий, Кривошапкиннар уонна эдэр ыаллар Сардана, Валерий Сергеевтар. Кыттааччылар талбыт өҥнөрүнэн астаабыт астарын туппутунан киирэн көрөөччүлэри күндүлээтилэр. Дьэ ол кэннэ саҕаланна олус көрдөөх күрэхтэр. Барыта аҕыс түһүмэхтээх бэһиэлэй оонньуулар ыытылыннылар. Кыттааччыларбытыгар бэртээхэй биэчэри бэлэхтээбиттэригэр махтанныбыт, олус астынныбыт. Күрэхпит сүрүн бириистэрин барытын олохтоох дьаһалта туруорар, онон салайааччыларбытыгар Семен Тимофеевичка, Петр Петровичка улахан махталбытын тиэрдэбит.

Сыл аайы муус оҥоһукка эр дьоннорбутун, уолаттарбытын көҕүлээн олохтоох дьаһалта кһрэх ыытар. Бу күрэххэ кыттааччылар сыл аайы бэртээхэй, киһи астынар бирииһин туталлар. Муус оҥоһук муҥутуур кыайыылааҕынан ааттанна Александр Сивцев. Иккис миэстэни үллэһиннилэр Валерий Сивцев, Егор Левин. Дьиэ таьын остуоруйа кэриэтэ киэргэтэн бастакы миэстэни Анна, Александр Сивцевтар ылыахтарын ыллылар. Иккис бочуоттаах миэстэни Агафья, Николай Захаровтар, үһүс миэстэни Эдик Левин туттулар. Кинилэр бары сыаналаах бириистэринэн наҕараадаланнылар.

Ити курдук Сииттэбит сиригэр саҥа сыл үтүөнү — кэрэни, дьолу — соргуну бэлэхтиирин туһугар, бар дьоммутугар анаан сэргэх тэрээһиннэри ыыттыбыт, тэрийдибит. Барыта этэҥҥэ буоллун. Кыттааччыларбытыгар барҕа махталбытын тиэрдэбит!

Марианна Сивцева.