Ыам ыйын 1 күнэ! Дьиҥнээх сааскы бырааһынньык, сүрэх үөрэр, сүрэх ыллыыр! Дьол түстэнэр, үлэ айхалланар, эйэ холууба көтөр.
“Үлэ уонна Маай” күнэ хас биирдии киһиэхэ үөрүүлээх түгэн. Бу күн «Үлэ чиэс, албан аат» истибиэригэр Күөх маайы көрсө үлэһит норуоту чиэстиир үөрүүлээх чаас буолан ааста. 2-с Лүүчүн аҕа баһылыга Юрий Лепчиков сандал саас кэлбитинэн, күөх маайынан нэһилиэк олохтоохторун бука барыларын ис сүрэҕиттэн эҕэрдэлээтэ, алгыс маанытын анаата. Тэрээһини С.И. Васильев аатынан норуот айымньытын дириэктэрэ Ариан Дьяконов иилээн -саҕалаан ыытта. Юрий Иванович 2-с Лүүчүн дьаһалтатын аатыттан эҕэрдэ суруктары Аграфена Семеновна Ксенофонтоваҕа, Нина Петровна Михайловаҕа, Эдуард Иванович Захаровка туттарда.
«Үлэ киһини киэргэтэр» диэн мээнэҕэ эппэттэхтэр эбит. Ол курдук, биһиги нэһилиэк биир бастыҥ дьоннорун бүгүн чиэстээтибит. Нэһилиэк, общественнай үлэтигэр куруук инники күөҥҥэ, тэрээһиҥҥэ көхтөөхтүк кыттар дьоммутугар, ону сэргэ туруу үлэһиттэргэ өрөспүүбүлүкэ үрдүк наҕараадаларыгар тигистилэр.
Ол курдук, Нина Петровна Михайлова ветеринарнай сулууспаҕа 41 сыл үлэлээн «Отличник ветеринарной службы» Саха Өрөспүүбүлүкэтин департаменыттан наҕараада тутта. Култуура министиэристибэтиттэн Афанасий Ноевтан «Отличник культуры Республики Саха (Якутия)» үрдүк наҕараадаҕа тигистэ — Эдуард Захаров. Саха өрөспүүбүлүкэтин департаменын махтал сурук наҕараадатын 2-с Лүүчүн тутаах исписэлииһэ Аграфена Семеновна Ксенофонтоваҕа туттардылар.
“Эйэ, Үлэ, Маай” бырааһынньыгынан бука барыгытын өссө төгүл эҕэрдэлиибит. Ыам ыйын ыраас халлаанын курдук киэҥ-куоҥ санааланыҥ, күлүмүрдүүр күнүн курдук кэрэ мичээр аргыстаныҥ, тулаҕытыгар үөрүү, дьол толору буолуохтун! Уҕараабат эрчими, чэгиэн-чэбдик туругу баҕарабыт!
Сардаана Жакипова, Мастаах нэһилиэгэ.